UE-UNICEF Entrega Motorizada 52 Ba MS

0
83
FOTO Espesial

DILI (TATOLI) – Uniaun Europeia (UE) ho UNICEF ohin, Sesta (07/07) entrega motorizada hamutuk 52 ba Ministériu Saúde (MS) iha Institutu Nasionál Saúde, Comoro, hodi apoiú Projetu nutrisaun integradu.

Diretóra Jerál Prestasaun Servisu MS, Odete Viegas hatete, atu fortalese programa nutrisaun, Uniaun Europeia ho UNICEF apoia Ministériu Saúdeliuhosi projetu nutrisaun integradu ho motorizada hamutuk 52 hodi ajuda ofisiál programa nutrisaun iha sentru saúde atu hasa’e kobertura prestasaun servisu nutrisaun no monitorizasaun.

“Motorizada hamutuk 52 ne’ebé ami simu tanba apoiu UE-UNICEF inklui ekipamentu hanesan plaka sukat ás nian hamutuk 248, dasin elektrónika hamutuk 274, dasin tara hamutuk 100, fita metru 552 inklui kapasete hosi item sira ne’e gastu ho osan valór U$ 149,600,” Diretóra Jerál Prestasaun Servisu MS, Odete Viegas informa iha Institutu Nasionál Saúde, Comoro, Sesta (7/7).

Odete konsidera suporta hosi organizasaun internasionál sira importante atu fasilita ofisiál programa nutrisaun iha munisípiu 10 eseptu Ainaro, Bobonaro no Ermera ne’ebé simu ona iha 2015 basa estatutu nutrisaun labarik no adultu sira iha Timor-Leste sei sai dezafiu.

Iha tinan 2014, projetu nutrisaun integradu implementa dadaun iha munisípiu 12 inklui Rejiaun Administrativa Espesiál-Oe-Cusse atinje ona labarik tinan lima mai kraik hamutuk nain 200.000, inan isin rua nain 94.000 no inan fó susu-oan ho apoiu nutrisaun nesesáriu.

Iha sorin seluk, Xefe Kooperasaun Dezenvolvimentu Uniaun Europeia iha Timor-Leste, Simon Le Grand hatete, aleinde de apoiú motorizada, sei fó mós formasaun ba koordenadór munisipál hotu atu suporta koñesimentu no abilidade adkiridu hosi MS atu bele hadia prestasaun servisu nutrisaun ba komunidade no akonsella nutrisonál ba inan ho nia oan sira.

“Ha’u nota katak koordenadór nutrisaun iha munisípiu 10 ne’ebé hetan formasaun hamutuk pursentu 50 maioria feto hodi hatudu melloramentu dalan ba igualdade jéneru iha Timor-Leste,” nia gaba.

Iha 2014, UNICEF hamutuk ho parseiru sira fornese apoiu ba MS ho suporta valiozu hosi UE atu fortalese kapasidade ba planeamentu peograma nutrisaun, implementasaun jestaun no koordenasaun, mellora asesu inan no labarik atu hetan nutrisaun ho kualidade, mellora asesu maternál, saúde infantil no labarik inklui komunikasaun mudansa hahalok nutrisaun.

Peojetu ne’e sei termina iha Dezembru 2017, espera katak kapasitasaun setór saúde sei atinje ho forma efetivu liu labarik no inan isin sira atu kontribui ba redusaun mal nutrisaun iha Timor-Leste.

Iha ámbitu serimónia entrega ekipamentu ba Ministériu Saúde, Reprezentante UNICEF, Ressiree M. Jongsma apresia ba lideransa MS nia papél lideransa ba fornesimentu nutrisaun labarik no inan isin rua nian iha Timor-Leste.

(Jornalista:Zezito Silva, Editór : Manuel Pinto).

HUSIK IDA HATÁN