UE Louva Servisu CNE ho STAE

0
90
Observadór Uniaun Europeia halo konferénsia imprensa konaba prosesu eleitorál iha Otél Timor. Segunda (24/7). Foto Tatoli/Julia Chatarina

DILI, (TATOLI) – Uniaun Eropeia liuhosi Xefe Delegasaun observasaun eleitorál Parlamentu Europeu, Ana Gomes gaba seriedade no esforsa tomak hosi Komisaun Nasionál ba Eleisaun (CNE-sigla portugés) ho Sekretaria Téknika Administrasaun Eleitorál (STAE) konsege hadi’a prosesu ho susesu.

“Ami observa no haree katak iha nível partisipasaun hosi votante ne’ebé a’as”, hatete iha konferénsia imprensa ne’ebé hala’o iha otél Timor, ohin.

Hodi hatutan: “Ami bele haree rasik nível jestaun prosesu eleitorál satisfatóriu hamutuk ho involvimentu ne’ebé di’ak tebes hosi populasaun tomak no konfiansa hosi sidadaun sira ba demokrasia no Estadu direitu”.

Maske nune’e, Parlamentu Europeu hato’o kestaun balun ne’ebé presiza atensaun hosi autoridade ne’ebé sei lidera Nasaun ba tinan lima tuir mai mak finansiamentu partidu polítiku, adopsaun lei anti-korupsaun, asesu ne’ebé justu ba mídia sira, ausiénsia publikasaun ofisiál ba lista kandidatu, no igualidade jéneru ladun  hetan nível konsiderasaun aas iha ajenda polítiku no sosiál.

Tuir sira nian observasaun ba orsamentu hosi partidu polítiku mak estabelesimentu limite ba doasaun. Ne’e, presiza rezolve no labele atraza kestaun transparénsia fonte finansiamentu, tanba timoroan presiza hatene oinsá partidu polítiku sira hetan finansiamentu, nune’e sira iha koñesimentu atu hili.

Adopsaun lei anti-korupsaun hodi garante publikasaun no kontrolu públiku ba patrimóniu pessoál deputadu no governu sira, nune’e bele hadi’a konfiansa timoroan ba reprezentante sira.

Aspeitu relevante seluk mak asesu justu ba mídia, presiza asegura nível asesu ne’ebé hanesan ba partidu no kandidatu hotu hodi garante katak asesu mídia sei la limita ka difini tuir kapasidade finansiamentu husi reprezentante sira.

Kestaun spesífiku relasiona ho ausiénsia publikasaun ofisiál ba lista kandidatu, maske grupu intersessadu prinsipál la konsidera katak kestaun ida ne’e sei la impede tranparénsia prosesu eleitorál, maibé ida ne’e bele sai dezvantajen ba reprezentasaun feto iha parlamentu.

Husu mos atu haree kestaun igualidade jéneru tanba ladun hetan nível konsiderasaun aas iha ajenda polítiku no sosiál hodi garante katak direitu feto no labarik sai realidade iha ámbitu privada no públika, nune’e Uniaun Europeia prontu atu fó tulun.

Nune’e mós, membru Parlamentu Europeu no Xefe Misaun Observasaun Eleitorál, Izaskun Bilbao Barandica kongratula no saúda povu no instituisaun tomak tanba organiza eleisaun ne’ebé pasífiku, kongratula mós partidu polítiku sira tanba hamosu ambiente pás.

Membru Parlamentu Europeu no Xefe Misaun Observasaun Eleitorál Uniaun Eleisaun, Izaskun Bilbao Barandica.

“Eleisaun hirak ne’e organiza ho di’ak ho kuadru jurídiku ne’ebé naton no kredivel inkluziva ho transparénsia, hahú ho presesu abertura estasaun votasaun nian iha loron eleisaun to’o prosesu apuramentu no kontajen”, tenik nia.

Sujere atu hadi’a prosesu eleisaun ne’ebé hala’o ba timoroan sira iha rai liur, nune’e bele hamosu sustentabilidade institusionál.

“Ami observa no nota katak funsionáriu públiku balun involve iha kampaña, sem hetan lisensa professionálal husi instituisaun no iha mós kazu intimidasaun balun”, katak tan.

Nune’e mós partidu polítiku sira ne’ebé kontra lei la hetan sansaun ne’ebé mak nesessáriu tanba laiha limite ba gastu partidu polítika sira ne’ebé tenke simu subvensaun hafoin eleisaun relasiona ho númeru votu válidu ba sira nia partidu no fó vantajen ba partidu prinsipál hanesan FRETELIN no CNRT.

Afirma tan, esforsu barak hodi bele aumenta feto iha uma fukun, halo TL sai país ne’ebé ho númeru feto iha aas liu iha rejiaun ázia pasífika. Presiza hadi’a espasu tanba feto sira ne’ebé mak hetan asesu laiha kondisaun ba responsabilidade kargu.

Liberdade atu hato’o opiniaun hetan númeru respeitu durante kampaña no iha kanal mídia sira iha kobertura tuir lei maibé iha kazu balun hanesan Rádiu Televizaun Maubere (RTM), ho rekursu ekonómiku forte bele utiliza didiak mídia sira hanesan instrumentu kampaña.

“Hato’o ba povu Timor-Leste tomak no autoridade eleitorál sira hotu nomós partidu polítiku sira, ita bot sira iha razaun atu haksolok ho prosesu no implementasaun husi eleisaun hirak ne’e tanba ita iha maioria notavel kompara ho prosesu eleitorál uluk nian”, tenik tan.

Nune’ e nia promete semana daruak fulan-setembru, membru parlamentu europeu iha planu atu fila hikas mai TL hodi públika relatóriu finál no sei inklui rekomendasaun lubuk ida ne’ebé ho objetivu hadi’a di’ak liu tan prosesu eleitorál iha futuru.

Jornalista: Julia Chatarina

Editora: Rita Almeida

HUSIK IDA HATÁN