Transparánsia-Akuntabilidade “Harame” Arena Debate Entre Partidu

0
95
Juvinal Dias, husi organizasaun La’o Hamutuk organiza no realiza hela debate publiku entre partidu. Foto FB: Maubere Gusmão

DILI (TATOLI)– Transparánsia, akuntabilidade no anti korupsaun sa’i nu’udar tema prinsipál ba debate públiku entre partidu polítiku 21 ne’ebé hetan lejitimidade husi tribunál rekursu hodi kompete iha eleisaun lejislativa, 22 jullu tinan ne’e, iha debate publiku ne’ebé organiza husi Core Group Transparánsia.

Debate publiku ne’ebé lidera husi Juvinal Dias, husi organizasaun La’o Hamutuk, iha otel novo turizmu, tersa (11/07), Lecidere, Díli ne’e partidu polítiku idaidak aprezenta sira-nia planu no programa ba dezenvolvimentu bainhira hetan mandatu husi povu hodi hakat liu barreira pursentu haat hodi ukun durante tinan lima.

Debate ne’ebé la’o demokrátiku tebes, tuir observasaun ajénsia Tatoli, reprezentante partidu polítiku idaidak la inklui FRETILIN (Frente Revolucionário de Timor-Leste Independente) tanba auzénsia, hamosu argumentasaun oioin ne’ebé mosu pro no kontra ba implementasaun dezenvolvimentu no funsionamentu sistema governasaun nian iha governasaun sestu konstitusionál inklui governasaun anteriór.

Hatan ba preokupasaun no lamentasaun sira ne’e, vise-ministru finansa, Helder Lopes, reprezenta mós partidu CNRT (Conselho Nacional da Reconstrução de Timor) hateten katak pontu importante tolu mak presiza haree.

Primeiru mak tenke haree ba rekursu (umanu no fasilidade),segundu mak haree instituisaun sira ne’ebé mak iha servisu, asosiadu ho asuntu transparánsia, akuntabilidade no anti korupsaun nian no ikus liu mak lei no regra atu nune’e instituisaun sira ne’e bele hala’o kna’ar no regra tuir lei ne’ebé mak define.

“Lei anti korupasaun ne’e, agora Parlamentu halo ona diskusaun iha nível komisaun. Ne’ebé, ita ko’alia kona-ba vontade husi mandatu agora, ita iha vontade atu kombate anti korupsaun, promove transparánsia no promove akuntabilidade,” reprezentante partidu ho lema: “Fiar Aan La’o ba Oin” ne’e akresenta.

Lei anti korupsaun ne’e, ita la dada naruk maibé, ita iha prosesu konstrusaun estadu entaun iha prioridade lubuk ida. “Ema kuandu hamlaha, ita ba ko’alia anti korupsaun? Ema rezolve hahan uluk lai ka ita ko’alia kona-ba korupsaun,” nia fó ezemplu.

Kona-ba transpáransia, governu iha Portál governu ne’ebé bele asesu no programa no sistema ne’ebé di’ak, kontinua promove nafatin. “CNRT komprometidu,” salienta Helder Lopes.

Hodi akresenta katak durante mandatu governasaun ida ne’e, governu konsege harii PCIC (Polícia Ciêntifico Investigação Criminal), Tribunal de Contas no seluk tan.

Hafoin remata, ajénsia Tatoli nota mós katak durante debate, maske iha diverjénsia idea husi reprezentante partidu polítiku sira maibé emosinalmente hatudu nafatin sira-nia maturidade hodi kria ambiente no relasaun ne’ebé “saudável”.

Entretantu debate publiku ne’ebé organiza husi Core Group Transparánsia ne’e hetan mós apoiu husi OXFAM.

(Jornalista: Rafy Belo, Editór : Manuel Pinto)

HUSIK IDA HATÁN