Tinan 2030 Kada Suku Sei Iha Kooperativa

0
107
Prezidente Federasaun Kooperativa Kréditu Hanai Malu, Elizario Ferreira

DILI (TATOLI)- Prezidente Federasaun Kooperativa Kréditu Hanai Malu, Elizario Ferreira hatete, federasaun define ona katak iha tinan 2030 kada suku sei iha kooperativa ida, postu administrativa iha kooperativa finanseira eselente, munisípiu sei iha uniaun no nasionál mak federasaun.

“Ne’e kuandu ami sura bazeia ba ami-nia membru ne’e, basta membru ida lori ema na’in-ida tinan-tinan, iha 2030 sei atinje ida ne’e,” Elizario informa iha Aitarak-Laran, ohin.

Nia hatutan, federasaun ne’e iha mehi katak iha tinan 2030 sei iha 150 mil membru kooperativa iha Timor-Leste no iha kapitál ne’ebé mak sei atinje mínimu liu mak millaun U$150 no millaun U$450 iha másimu.

Nune’e Federasaun prevé ona katak, iha tinan 2030 sirkulasaun membru kooperativa sei lalori osan tanba iha tempu ne’ebá sei iha funsionamentu sistema informátika kréditu uniaun Timor-Leste, sistema ida ne’ebé mak membru sira bele asesu sira-nia saldo iha kooperativa liuhusi telemovel.

“Ne’e programa foin la’o tinan ida, tanba ne’e mak sira hotu atu foti osan tenke bá lai kooperativa tanba ita-nia mentalidade presiza hadi’a, tanba ne’e formasaun sira hala’o atubele asegura de’it ida ne’e,” Elizario esplika.

Hodi kontinua fo sai katak, Programa federasaun nian ba planu 2030 ne’e aprova ona iha tinan 2015 ne’ebé hatete mínimu suku ida iha kooperativa ida maibé la’ós kooperativa kréditu mas kooperativa produtivu, hanesan Kooperativa haki’ak manu, sé suku ida iha poténsia ida ne’e, haki’ak ikan no poténsia ba kuda ortikultura kuandu populasaun sira moris iha vida ortikultura nia halo modo, entaun sira ne’e mak atu diversifika atividade ekonómiku ne’e iha nivel kada suku.

Aleinde ida ne’e, federsaun mós iha tempu besik atu halo sensus ekonómiku, oinsá mak atu hatene suku ida nia kapasidade ekonómika. “Como ami depende ba ami-nia kapasidade, ladepende ba doadór ruma ka Governu fó osan ba ami, tanba ne’e ami sei konsulta hela ami-nia membru sira husi 47 ne’e balun hatán atu kontribui osan, sira-nia ema atu tama-sai uma-uma.

Husi ne’e sei halo mapeamentu ida ne’ebé di’ak kona-ba área potensiál ne’ebé prodús no liuhusi ne’e bele fó informasaun ba Governu no bele diversifika atividade ekonómiku bazeia ba informasaun ne’e.

(Jornalista : Maria Auxiliadora)

(Editór : Manuel Pinto)

HUSIK IDA HATÁN