Timor-Leste Presiza “Antivirus”

0
77
Eis Prezidente Repúblika, Taur Matan Ruak entrega sertifikadu bolsu estudu ba estudante sira iha sala Arkivu Muzeu Rezisténsia, ohin. Foto mídia Sentru Queshadip Ruak

DILI, (TATOLI) – Eis-prezidente Repúblika, Taur Matan Ruak hateten, sosiedade no mundu ohin loron ema barak aproveita oportunidade ba nia aan duke ba ema barak. Mundu tomak halo ida ne’e inklui ita-nia nasaun.

“Biar  quinze anos mai ho vísiu barak husi nasaun sira dezenvolvidu, komesa hetan”, hateten eis-prezidente, Taur Matan Ruak  iha Auditóriu Arkivu no Múzeu Rezisténsia Timor-Leste (AMRT), ohin.

Kompara ho komputadór, se la iha antivirus ida forte atu kombate, tempu ba tempu, to’o momentu ida fó risku ba komputadór ne’e maske foun. Nune’e mós ba ita-nia nasaun.

Tanba ne’e pensaun vitalísia ba eis-prezidente repúblika ne’ebé fulan ida dolár 2.500 ne’ebé tinan ida hamutuk 30.000, tinan-tinan entrega ba Sentru Quesadhip Ruak hodi halo ba bolsa estudu.

“Estudante ne’ebé hetan oportunidade reprezenta mós sira seluk”, hateten eis-xefe estadu ne’e hodi akresenta katak tinan hirak mai bele muda estudante hirak ne’e nia moris.

Espera katak bele tulun estudante sira hodi remata sira-nia eskola. “La iha riku, la iha ki’ak. Maibé iha de’it mak sira ne’ebé iha oportunidade, no sira ne’ebé mak la iha oportunidade. Ha’u husu atu estuda makas”, eis-guerilleiru ne’e fó hanoin.

Estuda maka’as atu hetan futuru ne’ebé mak di’ak, hanesan ita hotu nia mehi, família nia mehi. Bainhira ita konsege, inan-aman kontente, família kontente no nasaun tomak kontente.

Ita luta maka’as hodi hetan fatin moris iha Timor-Leste. Nasaun ne’e hanesan ita nian, maun alin no família barak nia sakrifísiu mak ita bele harii tanba ne’e estuda.

Segredu ba ema ne’ebé mak manan ne’e, ema ne’ebé manan mak ema ne’ebé toba tarde, hadeer sedu, to’o uluk. “Keta haluha ida ne’e”, enkoraja.

Reitór UNTL, Francisco Miguel Martins hateten, Taur Matan ruak ninia lideransa, ninia kakutak no neon boot tebes.

Hein katak ita-nia lideransa balun bele mós atribui hanesan ne’e hodi foti mós ema kbiit laek ne’ebé mós hakarak eleva ninia kualidade, estuda iha edukasaun ne’ebé aas, iha nível superiór.

“Prezidente sesante, Taur Matan Ruak iha hanoin ne’ebé kapaas tebes, hanoin ne’ebé luan, boot no kle’an ba futuru país ida ne’e. Investimentu ba joven atu dezenvolve sustentável ba futuru nasaun nia dezenvolvimentu nasionál”, lideransa superiór UNTL ne’e konklui.

Jornalista: Rafy Belo

Editora: Rita Almeida

HUSIK IDA HATÁN