Timor Aid Introdus Prezervasaun Taís Ba PR

0
80
Estrutura Timor Aid entrega tais orijinál Timor ne'ebé durante ne'e ONG nasionál refere prezerva ba Xefi Estadu Lú-Olo. Imajen Mídia Palásiu PR.

DILI (TATOLI)—Estrutura hosi ONG Nasionál Timor Aid, sorumutu ho Prezidenti Repúblika (PR), Francisco Guterres Lú Olo hodi introdus ba Prezidenti atividade ne’ebé Timor Aid halo kona-bá kultura liu-liu prezervasaun taís ninian.

Estrutura Timor Aid ne’ebé hala’o inkontru ho Xefi Estadu iha Palásiu Prezidénsia Repúblika, Bairu-Pité, Dili, Sesta ne’e, maka kompostu hosi Prezidenti Diretivu Timor Aid, José Maria Lobato Gonçalves, Diretór Ezekutivu, Florentino Sarmento no Xefi Departementu Kultura, Rosália Madeira Soares.

Diretór Ezekutivu Timor Aid, Florentino Sarmento hateten, atu halo dokumentasaun ba kultura  Timor ne’e, Timor Aid produs ona livru tétun, portugés no inglés, nune’e bele halo promosaun ba leitór sira hosi estranjeiru, akadémiku sira no ema baibain.

“Ami mai hato’o ba Prezidenti Repúblika no ba ema hotu katak Timor iha nia kultura rasik,” Nia dehan no esplika liu-tan katak autór ba livru ne’e maka Rosalia Madeira Soares ne’ebé hanesan mós Xefi Departementu Kultura iha Timor Aid.

Florentino hatutan sira mós halo peskiza kona-ba oinsá atu hamoris fali produsaun tais orijinál. Nia tenik tais ne’ebé orijinál ne’e haree hosi nia matéria prima liu-liu kabas ne’e tenki mai hosi ai-abut no ai-tahan.

Iha biban ne’e, Prezidenti Repúblika senti orgullu tebes ba serbisu ne’ebé hala’o hosi Timor Aid tanba maske hasoru dezafiu oi-oin maibé ONG refere kontinua hamriik metin hodi haburas no hametin kultura Timor.

“Kultura ne’e hanesan ita nia klamar. Ita iha identidade klutura ne’ebé haketak ita ho rai seluk,” Lú Olo informa durante inkontru ho reprezentante Timor Aid.

(Jornalista: Xisto Freitas, Editór : Manuel Pinto)

HUSIK IDA HATÁN