SLN Halo Intervensaun Merkadu Hodi Normaliza Presu Foos

0
82
Foto google

DILI, (TATOLI) – Prezidente Konsellu Sentru Lojístiku Nasionál (SLN), Ministériu Komérsiu, Indústria no Ambiente (MKIA), Nívio Magalhães hatete SLN halo ona intervensaun merkadu direta hodi fa’an foos atu normaliza presu foos iha merkadu hafoin simu pedidu husi munisípiu no Postu Administrativu ne’ebé hato’o katak presu foos sa’e tanba impaktu husi El Nino.

Tanba ne’e iha etapa dahuluk nian SLN fa’an foos ho kuantidade 1.600 saka no etapa daruak fa’an foos 1.500 saka no halo intervensaun iha Autoridade Munisipál Ermera, Baukau, Munisípiu Ainaru no Manatutu liuliu iha área rurál sira.

“SLN husu nafatin ba Autoridade Lokál sira iha munisípiu ka Postu Administrativu, nomós Xefe Suku no Aldeia sira, karik iha sira-nia fatin hasoru difikuldade liuliu asesu ba foos folin sa’e iha ne’ebá, sira bele hato’o proposta mai SLN atu nune’e bele halo intervensaun ba merkadu”, Nívio informa iha Bebora, Dili, ohin.

Aleinde halo intervensaun direta, SLN mós halo intervensaun indireta liuhusi empreza privada. “Sira sosa foos husi SLN no fa’an ba públiku ho presu dólar 11”.

Foos ne’ebé SLN halo ba intervensaun merkadu ne’e husi armazein 03 Tibar no daudaun ne’e foos iha armazein refere iha tonelada 4.728 no sei aloka hotu ba intervensaun merkadu no ba ajuda umanitária .

“Hein katak to’o fulan-agostu, foos sira ne’e sei fa’an hotu ba komunidade tanba agora SLN simu pedidu barak ne’ebé hato’o katak foos iha área rurál iha parte Kelikai, Atsabe, Lolotoe no Iliomar ladún iha asesu ba foos tanba foos folin aas tanba ne’e SLN sei halo intervensaun”.

Aleinde ne’e iha armazein 02 Tibar tuir planu, tonelda 1.800 sei aloka ba merenda eskolár iha territóriu Timor-Leste tanba SLN simu mós pedidu husi Ministériu Edukasaun.

Antes ne’e SLN iha hanoin atu fa’an ba Ministériu Edukasaun maibé iha diskusaun entre membru Governu sira hato’o katak sei aloka de’it ba merenda eskolár.

Jornalista: Maria Auxiliadora

Editora: Rita Almeida

HUSIK IDA HATÁN