Sistema EHR Sei Atende Pasiente ho Di’ak

0
68
Primeiru Ministru bainhira lansa sistema dijitalizasaun iha Ospitál Nasionál Guido Valadares, ohin. Foto mídia GPM

DILI, (TATOLI) – Primeiru Ministru (PM), Rui Maria de Araújo hateten Sistema Electronic Health Record (EHR) ka rejistu saúde elektroniku bele fasilita pessoál saúde halo atendimentu di’ak liutan ba pasiente sira.

Nia esplika, sistema ne’e integradu ho pessoál saúde sira, laboratóriu, farmasia no emerjénsia, nune’e pasiente sira moras iha ne’ebé de’it, ninia dadus konaba nia moras no aimoruk saida mak nia konsumu iha hotu sistema ida ne’e.

Bazeia ba programa saúde iha família ne’ebé sestu governu lansa iha 22 jullu 2015 iha ema nain 991.024 mak rejistu ona to’o 2016 husi habitante 1,2 mil iha teritóriu Timor-Leste (TL) tomak, purtantu pursentu 80 ema mak ninian dadus rejistadu.

“Tanba tama ona pursentu 80  mak hamutuk ho Ministériu Saúde foti desizaun katak Ospitál Nasionál Guido Valadares (ONGV) bele uza sistema ida ne’e. Ema ne’ebé rejistadu, bainhira sira mai konsulta sira hatete sira nia laran, sistema sei hatudu sira nia dadus hotu”, esplika iha ninia intervensaun iha seremonia lansamentu sistema digitalizasaun saúde no inagurasaun klínika moras la daet iha ONGV, sesta (28/7).

Hodi dehan tan, sistema ho baze web ne’e fasilita médiku sira iha ospitál bele fó konsulta no hatama dadus kona-ba pasiente ba sistema, la presiza hakerek iha surat tahan tanba buat hotu rejistadu iha sistema.

“Sistema ne’e iha ligasaun ho farmasia, laboratóriu no importante liu iha ligasaun ho sentru saúde sira. Nune’e pasiente sira mai husi ne’ebé de’it, la presiza lori ona rujukan tanba bele halo elektronikamente hodi doutor sira hare”, katak tan.

Nune’e mós nia haktuir, ho sistema ida ne’e bainhira pasiente ida tama iha emerjénsia, bele loke ninia dadus hotu no bele hatene nia moras saida no hetan ona aimoruk saida no médiku sira la presiza ba nia istória detalla.

Alende ne’e, EHR ajuda rezolve problema abastesimentu aimoruk tanba durante ne’e seidauk konsege rezolve.

“Profesionál saúde sira hatene katak problema ka fukun boot iha abastesimentu aimoruk mak ita lahatene ezatamente ita nia konsumu ne’e di’ak, dadus iha farmasia no sentru saude dalabarak la konsege fó informasaun ne’ebé loloos konaba nesesidade amocixillina 500mg iha TL tinan ida ita uza hira”.

Informa tan, sistema ida ne’e mós ajuda jestór sira, hanesan diretór ospitál bele monotoriza, ohin loron médiku hira mak fó konsulta, no ba konsulta ba ema nain hira.

Hanesan mós diretór servisu ospitál distritál sira bele hatene sentru saúde ohin hetan pasiente hira no se mak fó konsulta.

“Husi perspetiva sira, jestór sira bele halo planeamentu di’ak liu tan konaba alokasaun rekursu úmanu no rekursu seluk”.

Jornalista: Julia Chatarina

Editora: Rita Almeida

HUSIK IDA HATÁN