Setembru Hahú Implementa Sistema Garantia Kréditu

0
113
Ministru Estadu Koordenadór Asuntu Ekonómiku (MEKAE) iha lansamentu ba programa Estratéjia Nasionál Empregu (ENE) iha Timor Plaza, horseik. Foto mídia SEPFOPE

DILI, (TATOLI) – Ministru Estadu Koordenadór Asuntu Ekonómiku (MEKAE), Estanislau Aleixo da Silva informa, setembru tinan ne’e hahú ona implementa Sistema Garantia Kréditu hodi fó kréditu ba empreza ka komunidade sira ho juru ne’ebé tuun.

Estanislau dehan Governu promulga ona eskema garantia bankária no fó prazu implementasaun loron 60 no Banku Sentrál Timor-Leste (BSTL) kompleta ona regulamentu no jere eskema ne’e sei liuhusi BSTL no kompleta dokumentu ne’ebé daudaun ne’e halo hela konsultasaun.

“Ha’u ko’alia ho governadór Banku Sentrál, nia husu mai ha’u para bele hahú ona konsulta depois ami sei halo lansamentu ba ida ne’e para setembru bele hahú ona fó kréditu ho jurus baixu mas keta haluha, ema labá empresta osan Governu nian, sira bá empresta osan banku nian pur tantu sira tenke selu osan banku nian”, Estanislau hatete iha Timor Plaza, horisehik.

Kréditu ne’e sei fó liuliu ba setór produtivu, pekena no médiu empreza para promove dezenvolvimentu setór ida ne’e nian.

“Nia labele bá husu osan atu hola karreta, sé nia halo negósiu hodi bá husu osan  atu hola pick up ida ka kamioneta para halo transporta sasán atu fa’an ne’e oin seluk ida mas ida ne’e tenke tuir kritériu ne’ebé banku iha no bainhira atu hetan garantia fundu ne’e, banku mós tenke atende kritériu ne’ebé estabelese husi regulamentu Banku Sentrál nian tanba banku mós iha risku bainhira ema selu jurus banku mós manán jurus ne’e”.

Bainhira banku mak halo jestaun ladi’ak Governu mós lafó garantia tanba garantia ne’e la’ós dehan osan iha banku atu foti de’it ona maibé tenke obedese ba kritériu ne’ebé banku estabelese.

Iha loron 30 maiu 2017, Konsellu Ministru aprova Dekretu-Lei Sistema Garantia Kréditu ba Empreza Ki’ik no Médiu timoroan sira.

Objetivu husi Sistema ne’e mak atu rezolve difikuldade Empreza Ki’ik no Médiu sira sempre hasoru iha aprezentasaun garantia ba banku komersiál. Entaun, sistema ne’e sei fasilita Empreza Ki’ik no Médiu sira hodi hetan asesu ba finansiamentu husi banku komersiál liuhusi kondisaun merkadu ne’ebe favorese. Sistema ne’e moós sei halo sira sai kompetitivu liután hodi kompete ho empreza estranjeiru sira hodi nune’e promove no haforsa liután empreza timoroan sira no kria empregu.

Jornalista: Maria Auxiliadora

Editora: Rita Almeida

HUSIK IDA HATÁN