ME sei Rezolve Problema Profesór 5192

0
170
Ministru Estadu Koordenadór Asuntu Sosiál, António da Conceição

DILI, (TATOLI) – Ministru Edukasaun, António da Conceição informa governu sei rezolve problema profesór sira ne’ebé hela iha área remota ne’ebé seidauk simu pose no atribui eskalaun nu’udar funsionáriu públiku.

“Sei iha tan problema ne’ebé mak ita sei rezolve. Cinco mil cento e noventa dois profesór sira ne’ebé mak hanorin iha área remota”, informa ba funsionáriu ME na’in 88 ne’ebé ohin simu tomada de posse ba kargu xefia iha salaun Infordepe, Balide.

Profesór sira ne’e laiha transporte no fasilidade hodi asesu ba transporte públiku hodi ba eskola, tanba hela iha mota ku’ak. Ne’e responsabilidade hodi prosede, labele ignora tanba razaun sira profesór ho nível “muito baixo”, la importante no la kontribui buat ida ba nasaun.

Hodi hatutan, profesór sira ne’e kontribui hanesan proverbio indonézia hateten “Pahlawan tanpa jasa”.

“Sira hela iha área ne’ebé remota liu, ita tenke serbisu ba ida ne’e”, akresenta.

Komisaun Funsaun Públika (KFP) no rekursu umanu halo ona enkontru no hein katak tempu badak iha solusaun. “Rejistadu ona nu’udar prioridade ba governu foun hodi deside, halo konversaun ba profesór cinco mil cento noventa e dois prioridade ne’ebé rekomenda husi Konsellu Ministru”.

Informasaun ne’e tenke pasa ba profesór sira hothotu atu labele dezanimadu. Maubere oan sira ne’ebé hela iha foho hein hela prezensa husi profesór sira ne’e hodi transmite siénsia.

“Labele greve tan cinquenta dolár hodi paraliza tiha estadu no depois justifika osan ida ne’e, ita-nia dignidade labele justifika ho osan, ita tenke kontinua moris nu’udar povu ne’ebé soberanu ba nasaun”, afirma.

Ho mandatu ne’ebé besik remata, nu’udar timoroan kontinua kontribui no halo buat ruma ba nasaun.

“Tanba ida ne’e, mai ita fó liman hamutuk, ha’u husu imi tomak nia partisipasaun, hanoin nu’udar funsionáriu, haketak tiha opsaun polítika, mai ita ba serbi nasaun”, apela governante ne’e.

Opta ba partidu ida, ne’e direitu sidadaun idaidak nian maibé responsabilidade ba nasaun ne’e ita hotu nian.

“Aproveita oportunidade ne’e, ami na’in tolu mós hakarak agredese ba imi hotu, imi-nia partisipasaun, imi-nia kolaborasaun durante mandatu”, nia agradese.

Entretantu, governante ne’e haktuir katak profesór sira iha semana kotuk kontesta dezempeñu Ministériu Edukasaun katak sira promovidu ona liuhusi progresaun eskalaun maibé la rekoñese saida mak sira simu. Ida ne’e, falta informasaun de’it.

“Ita labele kontribui ba ida ne’e, ita-nia responsabilidade mak klarifika informasaun sira atu publiku bele simu buat ne’ebé mak presiza hatene”, konklui.

Jornalista: Rafy Belo

Editora: Rita Almeida

HUSIK IDA HATÁN