Produtu Lokál Balun Bele Ona Nesesita Konsumidór Sira-Nia Nesesidade

0
56
Foto/Google.

DILI, (TATOLI) – Jerente Supermerkadu W4, Leoniza C. Ximenes hatete W4 daudaun ne’e hapara ona importasaun ba produtu balun tanba produtu lokál bele hatan ba nesesidade konsumidór rai-laran.

Produtu sira ne’ebé daudaun ne’e laimporta ona mak tomate, alfase, kouve-funan, malangeta (ai-manas boot) no modo mutin.

Jerente ne’e hatutan, produtu lokál balun ne’ebé iha mós rai-laran maibé sei importa husi rai-liur hanesan senoura no derok tanba iha stock ne’ebé limitadu no depende ba tempu mak produtu sira ne’e iha, nune’e sei haruka husi rai-liur mai.

“Maibé agora ne’e ami husi supermerkadu mós orgullu tamba ita-nia prudutu lokál atu komesa la’o di’ak ona iha merkadoria”, Loniza hatete iha Audian, ohin.

Kona-ba produtu lokál ne’ebé supermerkadu ne’e prosesu to’o tama iha merkadu mak halo koperasaun ho agrikultór sira ne’ebé mak iha baze hodi fó fini ba sira atu kuda hafoin nia rezultadu mak  supermerkadu ne’e ho nia transporte rasik bá foti no fa’an ba konsumidór sira.

“Sira mós la la’o mesak maibé sira hetan tulun husi Universidade Nasionál Timor Lorosa’e (UNTL), Fakuldade Agrikultura no  FAO (Food and Agriculture Organization of the United Nations) ne’ebé mak fó treinamentu ba sira”.

Grupu Agrikultór sira ne’ebé mak supermerkadu ne’e halo kontratu ho sira mak husi  Baukau, Aileu no Loes-Likisá, halo kultivasaun ba produtu lokál sira, nune’e supermerkadu W4 bele fornese ba konsumidór rai-laran.

Jornalista: Maria Auxiliadora

Editora: Rita Almeida

HUSIK IDA HATÁN