Produsaun Fini Batar komersiál iha Tonelada 160

0
28
Batar. Foto espesial

DILI, (TATOLI) – Xefe Departamentu Fini, Ministériu Agrikultura no Peska (MAP), Fernando Soares informa, produsaun fini iha tinan 2017 tuir dadus ne’ebé MAP rekolla, fini batar ba klase komersiál tonelada 160, fore-rai 16,5 no hare iha estatutu kontrolu.

Aleinde ne’e, fini batar hahú ona iha prosesu foti amostra ba teste laboratóriu ne’ebé bazeia ba oráriu iha Agostu mak sei fó sai rezultadu teste refere.

“Fini klase sertifikadu ne’ebé departamentu rasik mak prodús ne’e, batar tonelada 13, hare tonelada 15 no fore-rai iha tonelada 11”, Fernando dehan iha Komoro, ohin.

Ba fini sertifikadu ne’e, tanba ministériu mak prodús, nune’e daudaun rekolla hela no balun prosesa iha fatin produsaun sira ne’ebé sei tau iha armazein hitu ministériu nian depois fornese ba fali produtór fini komersiál iha rai-laran.

Fini klase sertifikadu ne’e, fini ida ne’ebé MAP fó kontratu ho grupu agrikultór sira atu prodús fini ida ne’e, depois MAP rekolla no prosesa iha armazein ministériu nian.

“Fini Komersiál ne’e prodús husi grupu ne’ebé hamahon-aan iha Asosiasaun Nasionál Produtór Fini Komersiál ne’ebé iha membru kuaze 69 iha munisípiu hotu inklui Oekusi. Balun kuaze nia performa ladi’ak tanba iha membru ne’e seidauk iha entuziazmu maka’as atu sai produtór fini entaun balun hetan problema, balun uma rai fini agora seidauk remata mas sira komesa hatoman aan ona katak sira sai ministériu nia parseiru iha kada époka atu prodús fini komersiál”.

Entantu, fini batar iha tinan ne’e nia kuantidade tuun uitoan kompara ho tinan kotuk ne’ebé atinje tonelada 200 no agora prodús de’it tonelada 160 tanba animál ka laho han, no anin huu monu hotu. 

Jornalista: Maria Auxiliadora

Editora: Rita Almeida

HUSIK IDA HATÁN