Prezensa ANAAA Garante Kualidade Edukasaun

0
55
Ekipa avaliadór ANAAA ho Reitór Dili Institute of Tecnology (DIT), Manuel Florêncio Vong hasai foto hamutuk iha Kampus DIT, Aimeti laran, Manleuana, Dili. Foto FB: reitór Manuel Vong

DILI, (TATOLI) – Reitór Dili Institute of Tecnology (DIT), Manuel Florêncio Vong konsidera prezensa ANAAA (Agência Nacional para a Avaliação e Acreditação Acadêmica) pozitiva tebes hodi halo avaliasaun ba ensinu superiór sira nune’e bele garante kualidade edukasaun iha Timor-Leste (TL).

“Ha’u hanoin katak dezenvolvimentu edukasaun ho prezensa ANAAA nian, órgaun indepedente ne’ebé mak halo avaliasaun ne’e, buat ida pozitiva tebes”, hateten reitór Manuel Vong ba Ajénsia Tatoli, iha fim-de-semana ne’e, iha nia kna’ar fatin Manleuana, Dili.

Inisiativa ne’ebé  ANAAA  halo mak haree prestaun serbisu universidade sira  fó ba estudante, hadi’a di’ak liutan kualidade edukasaun, nune’e produtu husi universidade mós iha kualidade.

“Ita prepara ema ba trinte e cinco anos, ita prepara iha universidade ne’e hanesan odamatan ikus nian. Sai husi ne’e, ba kedas ona kampu traballu no sira ba iha ne’ebá sira sei serbisu ba trinte e cinco anos ka bele mós to’o quarenta anos”, hateten akadémiku ne’e.

Ohin loron estudante barak termina lisensiatura ho idade nurak loos, lei reformadu to’o tinan 60 tanba ne’e preokupasaun boot ema hotu, timoroan tomak liga ho kualidade edukasaun.

Kualidade ne’e mai husi prosesu ida naruk, mai husi ensinu pré-eskolár kedas, mai ensinu báziku, mai ensinu sekundáriu, mai ensinu superiór ba selesaun atu tama, simu ho prosesu ida ne’ebé mak di’ak, simu iha prosesu aprendizajen durante tinan tolu ka haat nia laran.

“Prosesu aprendijazen ne’e tenke di’ak ho kondisaun hanesan, fasilidade, sala, internet, livru, biblioteka, laboratóriu, dosente, kurikúlu, osan, lideransa, avaliasaun no kualidade garantidu”, esplika.

Kuandu la kria kondisaun sira hanesan ne’e, kualidade sei dook husi hakarak. Maibé, fiar universidade sira ne’ebé akreditadu, komprometidu atu dezenvolve edukasaun ho kualidade.

Presiza fó atensaun ba sira ne´ebé sei iha nível lisensiadu, depois limita harii tan universidade barak, haree ba totál populasaun, se idaidak loke universidade bele iha duplikasaun kursu.

“Limita duplikasaun kursu, ema mak ne’e de’it, ita loke tan kursu barak, ita-nia kapasidade atu jere mós ladi’ak, entaun, ha’u hanoin katak dezenvolvimentu edukasaun ho prezensa ANAAA nian, órgaun indepedente halo avaliasaun ne’e, buat ida pozitiva tebes”, akresenta.

Hein katak serbisu ANAAA asegura duni kualidade edukasaun. “Ita-nia kualidade di’ak, ita-nia kompetetividade mós sei sa’e”, konklui.

Entretantu, DIT antes ne’e hetan akreditasaun ho valór pursentu 100 husi avaliasaun ANAAA. Kona-ba ANAAA, klik: http://www.moe.gov.tl/?q=node/36

Jornalista: Rafy Belo

Editora: Rita Almeida

HUSIK IDA HATÁN