PR Lú Olo Mantein Konfiansa Ba Maria Ângela iha KSMJ

0
357
Membru Konsellu Superiór Majistratura Judisiál, Maria Ângela Carrascalão (liman loos) kaer liman ho Prezidenti Repúblika, Dr. Francisco Guterres Lú-Olo bainhira hala'o sorumutu ho Prezidenti, sesta ne'e. Imajen Mídia Palásiu PR.

DILI (TATOLI)—Prezidenti Repúblika (PR), Dr. Francisco Guterres Lú Olo konkorda atu Dra. Maria Ângela Carrascalão kontinua ninia kna’ar hanesan membru Konsellu Superiór Majistratura Judisiál (KSMJ) iha Ministériu Justisa nia mahon.

Ângela Carrascalão nomeia hosi eis Prezidenti Repúblika, Taur Matan Ruak, iha tinan kotuk ho mandatu tinan haat maibé atuál Prezidenti Repúblika kontinua fó konfiansa ba nia.

“Ha’u membru Konsellu Superiór Majistratura Judisiál, indikadu hosi Eis Prezidenti Repúblika, Taur Matan Ruak, ba mandatu tinan haat. Ha’u hanoin katak ho Prezidenti foun, ha’u tenki husu nia opiniaun katak ha’u bele kontinua nafatin ka sai. Kna’ar ida ne’e nu’udar konfiansa polítika. Maibé Prezidenti husu atu ha’u kontinua serbisu ida ne’e,” Ângela dehan kestaun ne’e ba jornalista sira iha Palásiu Prezidénsia Repúblika, Bairu-Pité, Dili, sesta ne’e, hafoin ramata inkontru ho Xefi Estadu Lú Olo.

Kna’ar hosi Konsellu Superiór Majistratura Judisiál tau matan ba juiz sira nia problema, haree juiz sira nia promosaun no kareira. Nia haktuir katak normalmente serbisu ruma sempre hasoru problema maibé Konsellu konsidera ida ne’e la’ós problema boot.

Kona-ba Mandatu atuál Prezidenti Tribunál Rekursu ne’ebé antes ne’e sai polémika, Ângela hatán, problema ida ne’e agora laiha ona.

“Ha’u senti laiha ona tanba buat ida ne’e rezolvidu ona. Prezidenti Repúblika Lú Olo, ema ida ne’ebé bom sensu no hatene loloos katak estabilidade nasaun nian importante. Tanba ne’e, ha’u lá haree buat ne’e hanesan problema ida,” nia esklarese.

(Jornalista: Xisto Freitas, Editór : Manuel Pinto)

HUSIK IDA HATÁN