PNTL Nain 3849 Kolokadu Asegura Sentru Votasaun

0
64

DILI (TATOLI) –Segundu Komandante Jerál Polísia Nasionál Timor-Leste (PNTL), Faustino da Costa informa, PNTL hamutuk ema nain 3849 desloka ba munisípiu hotu hodi asegura sentru votasaun iha eleisaun lejislativa ba loron 22 Jullu 2017.

“Ohin membru Polisia Nasionál Timor-Leste (PNTL) halo parada deslokasaun atu aranka kedas ba munisípiu liu-liu sentru votasaun hodi asegura festa demokrásia,” Komisariu Faustino da Costa informa iha Komandu Jerál PNTL, Kaikoli, Kinta (20/7).

Membru PNTL nia obrigasaun mak tenke garante seguransa iha eleisaun 22 Jullu signifika katak ema hotu tenke vota ho livre, la iha ema ida mak intervene ema nia direitu votu eh viola ema seluk nia direitu.

Komandu jerál ho unidade polísia indika pesoál sira hodi fó apoiú ba komandu munisípiu sira maibé tenke kumpre hirarkia munisipál, rona ordem hosi planu diretiva operasionál.

Enkuantu, komandu jerál prepara transpórte besik 50  hodi apoiú komandu munisípiu sira hodi utiliza no jere ba tuir nesesidade komandu muinisípiu nian.

Transpórte hirak ne’e delegasaun komandu munisípiu mak sei jere no sei utiliza maibé sei entrega mós ba komandante munisípiu sira hodi jere tuir nesesidade komandu munisípiu nian.

“Membru polísia nia disiplina importante tebes iha seguransa eleisaun nian, la autoriza membru ida tama iha estasaun votu ho arma, la autoriza membru PNTL durante eleisaun ho kondisaun lanu tanba ne’e la’o doutriña PNTL nian,” Faustino fó hanoin.

Nune’e mós la autoriza membru seguransa sai fali lider partidu polítiku nian hodi halo buat balun durante votasaun, no membru destakadu munisipál sira la autoriza husik sentru votasaun to’o apuramentu munisipál no la autoriza membru sira husik hela komandu munisípiu sira nia autorizasaun.

Husu ba komandante munisípiu ida-idak atu kontrola ho efetivu ba membru sira no transpórte ne’ebé sira uza iha munisípiu.

Bainhira iha isidente ruma membru polisia no komandante informa ba komandu munisipál no komandante munisípiu sira iha obrigatoriamente hodi relata imediatu mai komandu jerál.

Entertantu atu fó seguransa polísia nia distánsia metru 25 hosi sentru votasaun no la ho arma hodi tama iha sentru votasaun.

“Eleisuan ne’e nudar sasukat importante ida ba Estadu Timor-Leste nian hodi tama adezaun ba Azean, tanba ne’e, atu garante Timor-Leste seguru presiza ema hotu nia kontribuisaun,” Faustino hakotu lia.

(Jornalista : Zezito Silva)

(Editór : Manuel Pinto)

HUSIK IDA HATÁN