PJR Rejista Kazu Rua Durante Kampaña

0
52
Prokuradór Jerál Repúblika, José Ximenes ko’alia ba jornalista sira hafoin enkontru ho Prezidente Repúblika iha Palásiu Prezidensiál Nicolau Lobato Bairo Pite, ohin. Foto Tatoli/Xisto Freitas

DILI, (TATOLI) – Prokuradór Jerál Repúblika (PJR), José Ximenes sorumutu ho Xefe Estadu, Francisco Guterres Lú Olo hodi informa kona-ba serbisu Ministériu Públiku nian nomós informa situasaun kriminalidade iha periodu kampaña eleisaun parlamentár.

“Primeiru, ha’u informa ba Prezidente Repúblika katak kampaña ba eleisaun parlamentár ne’e la’o di’ak teb-tebes tanba ita foin rejistu kazu rua de’it. Ida iha Same (Manufahi) ne’ebé nia prosesu agora la’o hela no ida iha Viqueque maibé agora polísia elabora hela partisipasaun kona-ba uma rua no motorizada balun hetan estragu”, dehan ba jornalista sira iha Palásiu Prezidénsiál Nicolau Lobato Bairu Pité, ohin, hafoin enkontru ho Prezidente Repúblika.

Aleinde ne’e, nia mós informa, PJR tinan ne’e hetan onra hodi sai hanesan uma na’in ba enkontru Prokuradoria Jerál Comunidade dos Países da Língua Portuguesa (CPLP) ne’ebé tuir planu sei hala’o iha 25 to’o 27 outubru.

“Konvite ami haruka hotu ona. Ne’e hanesan previleiju boot ida ba Timor-Leste tanba ba dahuluk ita organiza enkontru Prokuradoria Jerál CPLP”, esplika.

Aproveita oportunidade ne’e, PJR mós konvida Lú-Olo halo abertura ba enkontru refere no Xefe Estadu sei ba loke enkontru, kuandu ajenda seluk la difikulta.

“Kestaun seluk mós ami informa planu serbisu Prokuradoria Jerál Repúblika nian ne’ebé ami tau iha planu ida maka hanesan, desentralizasaun ba serbisu Ministériu Públiku nian”.

Hatutan: “Hanesan Ita hotu hatene katak Ministériu Públiku ezije ba iha Munisípiu Judisiál haat nomós distritu tolu sira seluk hanesan Viqueque, Bononaro no Ermera. Ami iha planu atu estabelese Planu Asaun Anuál ba tinan 2018 ninian, pelumenus estabelese tan Ministériu Públiku iha munisípiu balun liu-liu Manufahi no Lautém”.

Nia Hein katak Governu bele halo aprovisionamentu ba kestaun refere no husu mós Prezidente nia apoiu para bele ko’alia ho Governu, nune’e destaka orsamentu nesesáriu ba konstrusaun edifísiu Ministériu Públiku iha munisípiu sira.

Nia tenik planu seluk maka Konsellu Superior Ministériu Públiku iha 30 juñu liu-ba, aprova ona nune’e loke dalan atu nomeia timoroan na’in rua ba kargu Inspetur Ministériu Públiku nian.

“Ho ida ne’e, Ministériu Públiku sei kaer hosi timoroan sira. Internasionál nia prezensa só mentór de’it”, esklarese.

Nia mós informa kona-ba sidadaun estranjeiru na’in rua hosi Índia no Bulgária ne’ebé polísia kaptura iha Timor, foin lalais ne’e, tanba sidadaun na’in rua ne’e hetan kondenasaun hosi Tribunál Indonésia komete krime brankeamentu no dgora ninian.

Jornalista: Xisto Freitas

Editora: Rita Almeida

HUSIK IDA HATÁN