Períodu Governu Jestaun Labele Iha Planu Foun

0
108
Foto Hamutuk Eis PR Taur Matan Ruak ho Primeiru Ministru Rui Maria de Araujo ho membru Governu hafoin simu pose iha 2015 iha Palasio Lahane

DILI (TATOLI)—Primeiru Ministru (PM), Rui Maria de Araújo deklara katak governasaun ne’ebé dadaun ne’e nia parte lidera tama ona iha Períodu governu jestaun tan ne’e membru governu sira la bele hamosu planu foun ruma, maibé mantein halo jestaun ba ezekusaun orsamentu no aktividade bazeia ba planu orsamentu 2017.

“Governu jestaun signifika governu atúal VI governu labele foti desizaun foun ne’ebé bele hatodan servisu governu foun durante tinan 2017,ʺ PM Rui Araújo esplika ba Jornalista sira iha Palasiu Governu Dili, Tersa (18/07).

Iha Períodu Governu Jestaun ministru sira hanesan Ministru edukasaun, saúde, no seluk tan so bele halo de’it jestaun ba servisu   lor-loron nian hodi fó  atendementu  ba públiku. Ezemplu ida mak fasilita hanesan servisu tratamentu pasaporte, sertidaun RDTL, Saúde, edukasaun no seluk tan.

Iha Períodu governu jestaun ne’e mós tuir Rui Maria de Araújo membru governu bele delega kompetensia ba estruktura governu nian hodi tutela polítikamente, enkuantu membru governu halo de’it jestaun no bele aprova polítika ruma iha fulan ikus nian, maibé polítika ne’ebé hakarak aprova ne’e tenki enkaixa ona iha programa VI Governu ba  2017.

Mandatu VI governu iha meadu Fulan Agostu 2017, loron 22 remata ona tanba ne’e la iha dalan ida atu governu kria planu foun, maibé bainhira kria planu foun automatikamente sei hatodan servisu governu tuir mai nian, VII Governu.

ʺGovernu foun ne’ebé sei mai ne’e mai husi prosesu polítiku formasaun tanba ne’e prezidente repúblika ho partidu politiku ne’ebé manan iha tempu fulan ida sura husi loron eleisaun atu forma governu,ʺ Rui Maria de Araújo tenik.

Primeiru Ministru Rui Maria de Araújo legalmente lidera sextu Governu konstituisional durante tinan rua ho balun, sura hosi 16 Fevereiru 2015 (simu posé) to’o fulan Agostu 2017.

Nu’udar xefe Governu, Primeiru-Ministru iha podér atu fó-sai diretiva sira ba naran membru Governu nian ida, nune’e mós foti desizaun kona-ba matéria hirak inklui iha área hirak ne’ebé pertense ba kualkér Ministériu ka Sekretaria Estadu ida, no mós, podér atu kria komisaun no grupu traballu nian sira, eventuál ka permanente, ba asuntu hirak ne’ebé sai nu’udar kompeténsia Governu nian.

Primeiru-Ministru mós ezerse podér hirak ne’ebé relasiona ho servisu, organizmu no atividade sira iha Prezidénsia Konsellu Ministrus nian ne’ebé seidauk fó ba membru Governu seluk iha Prezidénsia Konsellu Ministrus nia laran, no bele delega ba naran membru Governu nian ida, kompeténsia ida ne’e, nune’e mós kompeténsia ne’ebé fó ba nia tuir lei.

Depende diretamente ba Primeiru-Ministru maka servisu no organizmu sira tuirmai ne’e: Servisu Nasionál Intelijénsia, Konsellu ba Delimitasaun Definitiva Fronteira Tasi nian, Komisaun Funsaun Públika, AMRT-Arkivu no Muzeu Rezisténsia Timorense nian, Governu Eletróniku ITC (e-governmet) no Gabinete Apoiu ba Sosiedade Sivíl.

Primeiru-Ministru hetan tulun husi Ministru Estadu Prezidénsia Konsellu Ministrus; husi Ministru Estadu, Koordenadór Asuntu Sosiál; husi Ministru Estadu, Koordenadór Asuntu Ekonomia, no husi Ministru Estadu, Koordenadór Asuntu Administrasaun Estadu no Justisa.

(Jornalista:Agapito dos Santos, Editór : Manuel Pinto).

 

 

 

HUSIK IDA HATÁN