PD Prontu Kontribui

0
268
Prezidente Partidu Demokrátiku, Mariano Assanami Sabino ko'alia ho jornalista sira iha Palásiu Prezidensiál, ohin, hafoin ho ninia estrutura hasoru Prezidente Repúblika, Francisco Guterres Lú Olo. Foto Tatoli/Xisto Freitas

DILI, (TATOLI) – Prezidente Partidu Demokrátiku (PD), Mariano Assanami Sabino hatete prontu kontribui tuir kbiit votu ne’ebé povo fó.

“Ami sei serbi tuir kbiit votus ne’ebé maka povu fó liuhusi eleisaun parlamentár foin lalais ne’e”, dehan Assanami ba jornalista sira iha Palásiu Prezidensiál Nicolau Lobato Bairo Pite, ohin, hafoin enkontru ho Prezidente Repúblika, Francisco Guterres Lú Olo.

Akompaña hosi estrutura partidu, Mariano hatutan, ninia parte sei la ko’alia kona-ba tama governu ka la’e tanba desizaun difinitiva ba rezultadu eleisaun parlamentár Tribunál Rekursu seidauk fó sai.

Maibé, ba Timor nia di’ak, nia afirma, PD sempre prontu atu fó nia kontribuisaun.

“Ami simu konvite hosi Prezidente Repúblika hodi ko’alia kona-ba situasaun iha kampaña no eleisaun, PD fó apresiasaun ne’ebé boot tebes no agradese tanba Prezidente nia esforsu no tanba povu nia maturidade a’as halo kampaña no eleisaun la’o hakmatek”, katak nia.

Nia hatutan hafoin eleisaun hatudu votus ne’ebé povu fó ne’e hanesan mensajen povu nian ba estabilidade no pás ba rai ne’e, maibé mós mensajen povu nian ba líder sira para bele túr hamutuk no la’o hamutuk.

Jornalista: Xisto Freitas

Editora: Rita Almeida

HUSIK IDA HATÁN