Partidu Sira Ukun Karik Keta Haluha Rezolve Dezempregu

0
39
Joven sira. Foto espesiál

DILI (TATOLI)—Joven dezempregadu sira espera partidu polítiku sira ne’ebé sei partisipa iha eleisaun lejislativa tinan ida ne’e, bainhira hetan lejitimidade husi povu atu ukun iha périodu 2017-2022, presiza implementa programa sira ne’ebé aprezenta durante kampaña liliu rezolve problema dezempregu ba foinsa’e sira.

Joven dezempregu ida, Arsenio Filipe do Rego Belo hateten, partidu polítiku ne’ebé hetan konfiansa husi povu hafoin eleisaun, importante tebes atu haree situasaun dezempregu iha rai laran, haree husi kapitál to’o área rurál sira.

“Governu tenke tau atensaun másimu ba kampu traballu ba joven sira nune’e bele mós evita violénsia hodi nune’e Timor-Leste bele sai paz no unidu liutan,” hateten alumni Ensinu Sekundáriu Jerál, Finantil, Díli ne’e ba Ajénsia Tatoli, ohin.

Iha área rurál, kampu traballu implementa, bele la másimu hanesan iha kapitál maibé pelumenus kria kondisaun natoon hodi bele fasilita mós moris joven sira alende sira-nia moris depedénsia ba iha agrikultura no atividade seluk tan.

Produsaun agrikultura iha, maibé de vez em quando, kondisaun estrada la di’ak hodi bele asesu produtu sira ba merkadu hodi bele hetan rendimentu natoon hodi sustenta nesesidade moris lorloron.

Tanba ne’e, presiza fasilita  mós empregu ba área rurál alende iha kapitál hodi hadi’a mós joven no povu nia moris. Promesa lubuk ida ne’ebé partidu sira halo iha kampaña tenke kumpri.

“Nune’e iha eleisaun tuir mai, povu nafatin fiar hodi fó ukun hodi lori nasaun no dezenvolvimentu ne’e tuir komprímisu ne’ebé halo durante diskursu iha kampaña,” realsa joven husi suku Tirilolo, Munisípiu Baucau ne’e.

Hodi reforsa katak joven hahú ona hatudu sira-nia atitude di’ak hodi partisipa iha “festa demokrasia” hodi kontribui ba hametin dame no estabilidade hodi ita bele moris iha armonia nia laran. Ho nune’e, fatór importante ida mak joven bele asesu mós kampu traballu.

“Joven nu’udar mós sidadaun kontribui ona hodi evita violénsia. Ita kontente moris iha paz, estabilidade no iha armonia nia laran,” dehan foinsa’e ne’e hodi husu mós ba foinsa’e feto eh mane seluk hodi hakribi violénsia.

“Tanba ne’e, governu presiza iha polítika di’ak liutan hodi kria kampu traballu ba povu no foinsa’e sira,” nia konklui.

Universitária ida, Maria da Costa hateten, komparasaun númeru dezempregu entre feto no mane ne’ebé la hanesan, presiza kria kampu traballu nomós halo tratamentu no oportunidade ne’ebé hanesan.

Konstituisaun Timor-Leste, artigu 17o (Igualdade ba feto no mane) garante direitu no obrigasaun hanesan iha moris família, kulturál, sosiál, ekonómiku no polítiku nia laran.

“Partidu polítiku ne’ebé sei ukun presiza kumpre programa kampaña no tau konsiderasaun maka’as mós ba iha joven sira liliu kria serbisu no tane aas valór igualidade, feto no mane,” dehan universitária ne’e iha kampus Liceu, UNTL, Díli.

Entretantu, tuir rezultadu Peskiza Forsa Traballu (PFT) antes ne’e hatudu katak Timor-Leste, taxa dezempregu nasionál hamutuk 11%.

Taxa dezempregu tuir jéneru, grupu idade no atinzimentu edukasaun, mane sira iha taxa dezempregu ne’ebé aas liu oituan (11.3%) kompara ho feto sira (10.4%). Relasiona ho atinzimentu edukasaun, rezultadu hatudu katak taxa dezempregu aas liu entre ema sira ho edukasaun sekundária (15%) no baisu entre ema sira ho edukasaun tersiaria (6%).

Ema sira ho nível edukasaun primária iha taxa dezempregu ne’ebé hanesan ho mediu nasionál (13%).  Kona-ba idade, ema foin-sa’e sira (idade tinan 15-24) iha taxa dezempregu ne’ebé aas (21.9%) kompara ho grupu idade hirak seluk. Iha evidénsia klaru ba relasaun kontráriu entre taxa dezempregu no idade.

(Jornalista: Rafy Belo, Editór : Manuel Pinto)

HUSIK IDA HATÁN