Ohin, Últimu Reuniaun Konsellu Ministru

0
99
Reuniaun Konsellu Ministru ohin, 18/7/2017. Foto/GPM.

DILI, (TATOLI) – Reuniaun Konsellu Ministru sira-nian loron 18 jullu 2017, sai hanesan últimu enkontru VI Governu nian hodi foti desizaun ba Dekretu Lei ne’ebé Prezidente Repúblika entrega atu halo revizaun.

Ministra Interina Turizmu Arte no Kultura, Maria Isabel de Jesus Ximenes ba jornalista sira iha Palásiu Governu hatete, Dekretu Lei ne’e reaprova ona no sei haruka fali ba Prezidente Repúblika nomós sorumutuk ne’e ko’alia mós sobre avaliasaun ba sistema edukasaun iha Timor-Leste no kria polítika ba labarik sira.

“Mak ne’e de’it, ladiskute buat barak no iha buat barak mak hein fali maibé Konsellu Ministru ohin ne’e últimu ne’ebé foti desizaun ruma no aprova dekretu lei sira ne’e”, dehan nia.

Dekretu Lei ne’ebé governu simu mak husi parte Sekretáriu Estadu Komunikasaun Sosiál  husi Prezidénsia Konsellu Ministru nian sobre alterasaun Dekretu Lei númeru 42/2008, Reaprovasaun Dekretu-Lei: Kria Ajénsia Teknolojia Informasaun no Komunikasaun I.P. (TIC) Timor husi Primeiru-Ministru, Dekretu Lei Murak Rai Timór husi Ministériu Petróleo no Rekursu Minerál, no Estatutu Konsellu Kombatente Libertasaun Nasionál.

Atuál Serkretária Estadu Arte no Kultura ne’e hatutan, dekretu Lei hirak ne’e halo ona reaprovasaun no sei haruka fali bá Prezidente Repúblika atu halo promulgasaun.

Iha sorumutuk ikus ne’e prezide husi Primeiru-Ministru, Rui Maria de Aráujo no partisipa husi Ministru Estadu no Prezidénsia Konsellu Ministru, Agio Pereira, Ministru Agrikultura no Peska no Ministru Estadu Koordenadór Asuntu Ekonómiku, Ministru Negósiu Estranjeiru no Kooperasaun, Hernâni Coelho, Sekretáriu Estadu Terras no Propriedade, Jaime Xavier Lopes,  Serkretária Estadu Arte no Kultura, Maria Isabel de Jesus Ximenes,  Ministru Petróleo no Rekursu Minerál, Alfredo Pires, Ministru Estadu Koordenadór Asuntu Administrasaun Estadu no Justisa no Ministru Administrasaun Estatál, Dionísio Soares Babo, Ministru Edukasaun no Ministru Koordenadór Asuntu Sosiál, Asntónio da Conceição, Vise-Ministru Komérsiu, Indústria no Ambiente, Filipus Nino Pereira no no Sekretáriu Estadu Juventude no Desportu, Leovigildo Hornay.

Jornalista: Maria Auxiliadora

Editora: Rita Almeida

HUSIK IDA HATÁN