Observa Eleisaun STAE Briefing Observador Internasional

0
67
Foto STAE

DILI (TATOLI) – Diretór Jerál Sekretariadu Tékniku Administrasaun Eleitorál (STAE), Acilino Manuel Branco  informa, Sekretariadu Tékniku Administrasaun Eleitorál (STAE), ohin, Kuarta iha Timor Plaza briefing Observadór Internasionál kona-ba prosesu eleisaun lejislativa iha 22 Jullu 2017.

Sorumutu ne’e ita fó briefing téknikal ba observadór internasionál sira durante ne’e mai hosi rai liur tanba ne’e sira presiza hatene informasaun sira kona-ba prosesu eleisaun nian, nune’e bele fasilita sira atu halo observasaun iha terenu,” Diretór Jerál Sekretariadu Tékniku Administrasaun Eleitorál, Acelino informa ba Ajénsia TATOLI iha Timor-Plaza, ohin, Kuarta (19/7).

Nia dehan, teknikal briefing ne’e koalia kona-ba sistema eleitorál liu-liu funsionamentu orgaun eleitorál nian iha Timor-Leste, ho nune’e observadór internasionál sira tenke iha koñesimentu klean ba prosesu aktu eleitorál atu sira bele halo observasaun iha terenu.

Hodi bele garante kredibilidade observadór internasionál,  sira presiza hatene prosesu eleisaun hanesan oinsa atu vota, oinsa atu halo kontazen no oinsa ho sistema tabulasaun.

Materiál prinsipál mak enkuadramentu legál kona-b prosesu eleisaun tomak, sistema eleitorál ho nia funsionamentu no ita sei fo oportunidade ba sira atu partilla esperiénsia nasaun balun nian no planu seguransa nian oinsa atu bele garante eleisaun ne’ebé seguru tanba sira mos sei desloka ba área remota iha munisípiu sira.

Iha sorin seluk, Vise Ministru Administrasaun Estatál (MAE), Thomas do Rosario Cabral reforsa katak, Papél observadór internasionál pertinente atu haree direita prosesu eleisaun lejislativa iha 22 Jullu importante tanba hafoin festa demokrásia sira bele hato’o relatóriu no rekomendasaun sira atu ba futuru bele hadia di’ak liu tan.

“Ita konvida sira mai atu hola papél observasaun eleisaun iha Timor-Leste, saida de’it mak sira haree iha terenu sira tenke hakerek hodi relata ba governu no parlamentu foun atu ita bele tau atensaun iha futuru” Vice Ministru ne’e esplika.

Nia husu ba observadór sira ne’ebé destakadu ona iha munisípiu sira atu bele tau matan ba prosesu eleisaun  no loron  20 no 21 partidu sira labele halo tan kampaña tanba ne’e tempu silénsiu nian.

Antes ne’e, Diretór Jerál STAE, Acilino Manuel Branco hateten observadór internasionál sira atu haree direita prosesu eleisaun iha Timor-Leste hamutuk ema nain170.

(Jornalista : Zezito Silva, Editór : Manuel Pinto)

HUSIK IDA HATÁN