Nasaun Pás Implementa Dezenvolvimentu Sustentável

0
41
Ofisiál polítika públika GPM, Alex Tilman. Foto Tatoli: Rafy Belo

DILI, (TATOLI) – Reprezentante Gabinete Primeiru-Ministru (GPM), Alex Tilman hateten nasaun hothotu ne’ebé mak iha demokrasia, inkluzaun sosiál, moris pás halo esforsu atu manten pás no estabilidade.

“Sira otomotikamente implementa hela Objetivu Dezenvolvimentu Sustentável”, hateten ofisiál polítika públika GPM, Alex Tilman iha Ministériu Negósiu Estranjeiru no Kooperasaun (MNEK), Praia dos Coqueiros, tersa (4/7).

Nasaun sira hanesan ne’e sempre hanoin ba oin, hanoin kona-ba futuru. “Dezde ita restaura ita-nia indepedénsia iha 2002, ita hahú kedas ho dezenvolvimentu ida sustentável”, reforsa.

Ne’e duni, nasaun hotu, simeira 2015 iha Nova Yorke adota dezenvolvimentu sustentável, loron tolu antes governu ona inisiativa pasa rezolusaun ida hodi hateten katak apoia ajenda 2030 ne’e.

Depois la’ós de’it governu maibé bainhira simeira Nova Yorke liutiha, Novembru ita-nia Parlamentu Nasionál (PN) mós ho votu unanimidade, deputadu hothotu apoia ka suporta tan buat ne’ebé governu foti ona.

“Ne’e duni, Objetivu Dezenvolvimentu Sustentável la’ós buat foun ida, buat ida ne’ebé kontroversiál tan ema hothotu hakarak”, akresenta.

Uma kain idaidak mós hakarak dezenvolvimentu sustentável katak ita utiliza ba oin maibé la prejudika jerasaun sira tuir mai. “Sira mós goza ida ne’e”, hakotu Alex Tilman.

Entretantu Objetivu Dezenvolvimentu Sustentável adota objetivu 17 atu transforma ita-nia mundu.

Objetivu 17 ne’e mak hanesan elimina ki’ak, eradika hamlaha, saúde ho bem estar, edukasaun ho kualidade, igualidade jéneru, bee moos no saneamentu, enerjia moos no asesível, traballu dignu no kreximentu ekonómiku nomós indústria, inovasaun no infrastrutura.

Inklui, reduz dezigualidade, sidade no komunidade sustentável, produsaun no konsumu sustentável, asaun klimátika, proteje vida marítima, proteje vida rai-leten, paz, justisa no instituisaun efikaz nomós parseria ba objetivu sira ne’e.

Jornalista: Rafy Belo

Editora: Rita Almeida

HUSIK IDA HATÁN