MS Prioritiza Rekursu Úmanu Hodi Garante Kualidade

0
71
Vise Ministra Saúde ho Retór UNTL hatudu assinatura akordu entre parte rua. Foto mídia komunikasaun sosiál

DILI, (TATOLI) – Tuir planu estratéjiku Ministériu Saúde (MS) ba tinan 2011 to’o 2030 mak fó importánsia ba rekursu úmanu hodi prioritiza setór edukasaun nu’udar fatór determinante ba kapasitasaun no koñesimentu públiku, liuliu infermeiru no parteira sira hodi servi povu no nasaun.

“Ministériu Saúde iha nia planu estratéjiku 2011-2030 ho nia prioridade mak rekursu úmanu atu garante kualidade rekursu úmanu presiza iha nivél edukasaun ne’ebé di’ak, nune’e hosi asina akordu ne’e atu prioritiza setór edukasaun nu’udar save ba dezenvolvimentu nasaun nian”, hateten Vise Ministra Saúde, Ana Isabel Soares iha nia intervensau kona-ba asina akordu ho UNTL iha salaun MS, Kaikoli, ohin.

Akordu entre MS ho Universidade Nasionál Timor Lorosa’e (UNTL) halo atu enfermeiru no parteira sira durante ne’e servisu maibé ho nivél edukasaun sekúndaria hamutuk 300, ho oportunidade ne’e sira bele kontinua eskola hodi hetan grau bazarelatu iha universidade públiku, entretantu, prosesu estudu sei hala’o iha tinan akadémiku foun 2018.

Governasaun dahuluk to’o governasaun da neen, MS periodikamente koopera ho universidade oioin hosi rai laran ho intensaun atu eleva kapasidade eh atu forma tan rekursu foun, nune’e bele responde nesesidade krítika no atu hatan ba planu estratéjiku ministériu nian.

Haktuir tan, durante ne’e ministériu promove bolsu liuhosi Orsamentu Jerál Estadu (OJE) ba bolseiru medisina jerál besik ema 800 ne’ebé mak tuir formasaun iha nasaun Kuba no UNTL.

Iha parte seluk, Reitór UNTL, Francisco Miguel Martins akresenta akordu ne’e importante atu eleva kualidade iha nivél ás, nune’e dezenvolve no partisipa di’ak liu tan iha prosesu dezenvolvimentu nasionál liuliu iha área saúde nian.

UNTL nu’udar instituisaun públika ho téknika formadora ba formasaun adekuada elevada no avansada hodi hala’o kna’ar ho didi’ak ho kualidade hodi servi. Universidade ne’e mós eleva kualidade edukasionál ho objetivu atu eduka ema ho téknika teóriku no téknika prátika.

Akresenta, enfermazen no parteira importante tebes ba Nasaun. Universidade dezenvolve  ona besik tinan 17, durante ne’e hala’o hela kna’ar no funsaun nu’udar instituisaun akadémika  no dizeminasaun koñesimentu.

Jornalista: Zezito Silva

Editora: Rita Almeida

HUSIK IDA HATÁN