Mina Nuu Puru TL Tama Ona Merkadu Doméstiku

0
158
Ministru Komérsiu Indústria no Ambiente (MKIA), Constâncio da Conceição Pinto partisipa iha lansamemtu VCO iha Timor Plaza hamutuk ho estrutura MKIA no Diretór empreza SORMA,Lda, Gaspar Quintão da Silva.

DILI (TATOLI)—Diretór empreza SORMA, Lda, Gaspar Quintão da Silva informa, parte empreza halo ona lansamentu ba Virgen Coconut Oin (VCO) no mina nuu puru iha merkadu doméstiku. entertantu antes ne’e Kompañia SORMA,Lda mós hetan ona apoiú  husi Ministériu Komérsiu Indústria no Ambiente (MKIA) ho osan montante mil U$12.000.

“Mina Nuu puru ne’e orijinál no orgániku tebes no di’ak mós ba saúde no kosumu dapur nian,”  Gaspar hatete iha lansamentu VCO iha Timor Plaza, ohin.

Tuir Gaspar, antes lansa mina nuu ne’e ba liur parte kompaña halo uluk teste laboratóriu iha Bali-Indonézia atubele hatene nia teór (kadar) no seluk tan, rezultadu hatudu katak laiha aditivu balun iha laran.

Ho koalidade ne’ebé mak garantidu Diretór ne’e husu ba Governu atu kontinua apoiú hodi haboot produsaun VCO, mina-tein no seluk tan no rekomenda ba Governu atu fó hanoin nafatin ba supermerkadu potensiál sira iha Dili no munisípiu sira seluk atu kontinua fó fatin ba produtu lokál hodi fa’an iha sira-nia fatin atu ajuda hasa’e rendimentu produsaun.

Iha Sidade Dili, VCO daudaun ne’e fa’an ona iha supermerkadu sira iha Dili laran no habelar ona nia rede servisu hamutuk ho produtór nuu iha Timor-Leste laran tomak ho ema hirak ne’ebé hala’o sira-nia prátika uza métodu kultivasaun tradisionál.

“Ami fulan-ida prodús dala haat, iha botir 450 no botir ki’ik ne’ iha lítru 180 no boot iha 280 kada semana, razaun ami sei prodús ki’ikoan tanba merkadu sei kiik no agora sei espalla iha merkadu potensiál iha Dili no Manatutu mas ami espera katak iha posibilidade bele habelar tan ba munisípiu sira seluk,” Jerenti VCO haktuir.

Hodi esplika presu VCO ne’ebé tama iha supermerkadu sira ne’e mili lítru 250 ho folin U$1.50 no mili lítru 400 U$2.50 maibé depende ba supermerkadu sira tanba sei hasa’e presu uitoan no kompañia ne’e esforsu atu hatún presu, maibé konforme matéria prima nia folin tanba nuu fuan sia iha dólar ida. Entertantu kada nuu maran di’ak fuan sanulu prosesa foin hetan mina-nuu lítru ida, nuu hirak ne’e mós VCO sosa husi agrikultór sira iha Timor-Leste laran tomak liuliu iha área hirak ne’ebé iha plantasaun nuu hanesan munisípiu Manatutu, Lospalos, Vikeke no Autoridade Munisipál Dili no Baukau.

Iha fatin hanesan Diretór Jerál Indústria no Kooperativa, António da Costa louva kompañia SORMA tanba iha inisiativa hodi bele foti produtu ida ne’e sai produtu ida ne’e bele diversifika poténsia Timor-Leste ne’ebé iha no hatudu progresu ida ne’ebé MKIA suporta ba grupu barak iha Timór laran tomak.

Aleinde de ida ne’e, Ministru Komérsiu Indústria no Ambiente (MKIA), Conceição Pinto iha lansamentu Virgen Coconut Oil hatete, susesu kompañia SORMA hanesan impulsu boot ida ba MKIA no sidadaun liuliu ba grupu sira, tanbá ne’e MKIA apoiu nafatin atu halo promosaun ba produtu SORMA nian.

Tuir Constâncio programa “Governu nian fó ba kompañia” hosi MKIA iha duni rezultadu konkretu ida, tanjivel ba merkadu ne’ebé iha no ida ne’e mak espetativa MKIA nian ne’ebé fó apoiu ba grupu sira.

Tanba ne’e ho lansamentu Virgen Coconut Oil  husi empreza ne’e bele redús dezempregu iha rai-laran  no hasa’e income liuliu ba grupu.

Governante ne’e mós promete iha tinan hirak nia laran ita substitui ona produtu balun hanesan masin, kafé no mina nuu, ita hein katak ita-nia konsumidór sira, sidadaun timoroan hadomi duni ita-nia produtu, konsumu mak ita-nia produtu duké konsumu produtu mai husi rai-liur.

Nia kompara iha Mundu mundu daudaun ne’e ema hotu-hotu buka mak produtu orgániku, hanesan VCO laiha aditivu, kímiku balun no puru naturál ne’ebé mai husi nuu.

Tanba ne’e presiza halo promosaun ba ida VCO, la’ós de’it iha rai-laran maibé iha mós rai-liur.

“MKIA sei fó apoiu nafatin liuliu ba iha promosaun nian atu produtu ida ne’e bá iha merkadu internasionál,” Constâncio promete.

No husu atu kompañia serbisu maka’as halo promosaun no MKIA promove iha mídia atu konvense konsumidór sira para sosa mina Timór nian tanba di’ak tebes ba problema saúde.

Ba sidadaun sira Constâncio husu atu hadomi ita-nia produtu, sosa ita-nia produtu, konsome ita-nia produtu duké sira ne’ebé mai husi liur ne’ebé ita lahatene.

(Jornalista : Maria Auxiliadora, Editór : Manuel Pinto)

HUSIK IDA HATÁN