Merkadu Traballu Timor-Leste Tenke “Amplia”

0
125
Mario da Costa Marçal aprezenta nia rezultadu peskiza. Foto espesiál

DILI (TATOLI)—Rezultadu peskiza bolseiru timoroan iha Brasil, Mario da Costa Marçal konklui katak sosiedade timoroan tenke partisipa ativamente iha dezenvolvimentu nasaun nian no presiza implementa polítika industriál hodi “amplia” ka aumenta tan merkadu traballu.

Mario da Costa Marçal

“Mezmu la iha esplorasaun ba traballadór sira, bele mós halo fortalesimentu ba empreza privada timoroan nomós sosiedade timoroan sira liuhusi kréditu, tributáriu no modernizasaun ba makina indústria no la estraga ambiente,” relata bolseiru Mario da Costa Marçal ba Ajénsia Tatoli, ohin, sesta (7/07) husi Brasil.

Hodi esplika katak polítika indústria Timor-Leste nu’udar meius ida ba dezenvolvimentu no implementasaun polítika ida ne’e bele garante bem estar sosiál no liberdade hodi partisipa iha programa no planu estadu nian.

Polítika indústria ba Timor-Leste nu’udar nesesidade ba estadu no sosiedade ba formasaun dezenvolvimentu nasaun nian. “La’ós simplesmente ba modernizasaun atividade indústria sira,” nia relata.

Bolseiru kursu Administrasaun Públika, Mario Marçal akresenta, hanoin ba dezenvolvimentu Timor-Leste, presiza tau iha konsiderasaun katak individu idaidak nu’udar sentru ba dezenvolvimentu no presiza valoriza ema.

“Polítika indústria Timor-Leste labele simplesmente lori merkadu traballu ba timoroan sira hodi aumenta sira nia renda, maibé presiza haree ba moris sosiedade nativa nian ne’ebé konsekuentemente lori dezenvolvimentu ba nasaun,” esplika timoroan ne’ebé hala’o nia estudu iha Universidade da Integração Internacional da Lusofonia Afro-Brasileira, Brasil ne’e.

Hodi reforsa katak iha mundu globalizasaun ohin loron komersiu internasionál hala’o kna’ar importante ida hodi manten relasaun ho nasaun sira seluk.

Tanba ne’e labele hanoin dezenvolvimentu Timor-Leste ho maneira ne’ebé izolada maibé importante nasaun tenke espesializa nia produtu determinadu hodi fa’an ba nasaun seluk ka esporta ninia produtu sira.

“Relasaun komérsiu eksteriór bazea ba teória vantajen komparativa, estadu tenke dezenvolve nia kapasidade no teknolojia hodi kompete iha merkadu internasionál,” nia haktuir.

Entretantu tema peskiza ne’ebé estudante timoroan ne’ebé hala’o iha nia estudu iha nasaun belun, Brasil ne’e mak: “Desenvolvimento Para o Timor-Leste: Uma Análise da Política Industrial”.

(Jornalista: Rafy Belo, Editór : Manuel Pinto)

 

 

 

HUSIK IDA HATÁN