Membru PNTL 140 Sei Hetan Reforma

0
235

DILI (TATOLI) – Membru Polisia Nasionál Timor-Leste (PNTL) hamutuk 140 sei hetan reforma bainhira estatutu pesoál PNTL hetan ona aprovasaun hosi Konsellu Ministru.

Komandante Jerál PNTL, Komisariu Júlio Hornay dehan, “Lista PNTL ne’ebé sei reforma hamutuk 140 maibé ita hein estatutu pesoál PNTL, kuandu hotu ona no aprova ona iha Konsellu Ministru, entaun ita bele implementa ona.”

Tuir Hornay bainhira implementa ona polítika reforma ba membru polísia ne’ebé nia idade 60 ba leten automatikamente parte PNTL sei rekruta hikas ajente foun hodi halo subtituisaun.

“Bainhira membru PNTL ne’ebé idade reformadu ona ita bele rekruta tan membru foun atu bele rekopera,” Komandante Jerál PNTL, Julio da Costa Hornai ba jornalista sira iha Komandu Jerál PNTL, Kaikoli hafoin hasoru malu ho Prezidente Repúblika, Segunda (17/7).

Enkuantu, hatan ba situasaun rai laran, Hornay afirma, situasaun jerál iha Timor-Leste la’o hakmatek tanba povu matenek hotu ona, lider partidu polítiku bele eduka sira nia militante sira katak saida mak krime no saida mak violénsia signifika katak sira hatene ona hodi kontribui ba estabilidade no páz.

Hein katak nudar Timoroan sei asegura nafatin estabilidade no páz iha ambiente eleisaun ne’ebé sei akontese iha 22 Jullu 2017.

Tanba eleisaun ne’e ita hotu nian, la’ós lider partidu polítiku nian de’it, kiik to’o boot nian, kuandu ita hotu asegura ida ne’e to’o objetivu ne’ebé ita hakarak sai hanesan istoria boot ba Timoroan.

Maibé kuandu festa demokrásia ida ne’e mak iha problema signifika katak ita hetan vitória sorin de’it.

(Jornalista : Zezito Silva, Editór : Manuel Pinto)

 

HUSIK IDA HATÁN