Mandatu Autoridade Munisipál Prolonga Tan

0
191
Sekretáriu Estadu Konsellu Ministru Avelinho Coelho

DILI (TATOLI) – Konsellu Ministru (KM) aprova rezolusaun governu ohin, Tersa (11/07) hodi halo prolongamentu mandatu ba Prezidente Autoridade Munisipál no Administrasaun Munisipál sira.

Sekretáriu Estadu Konsellu Ministru Avelinho Coelho informa,  KM aprova rezolusaun governu kona-bá prolongamentu mandatu Prezidente Autoridade munisipál no Administrasaun Munisipál ne’ebé aplika númeru 1 artigu 2, Dekretu lei 37/2016, 7 Setembru.

“Ba prolongamentu mandatu ba to’o 2018 hosi autoridade munisipil no administrasaun munisipál, rezolusaun ne’e mós koalia kona-bá oinsa mak atu selu subsídiu ne’ebé durante ne’e sira ladauk simu,” Avelinho Coelho informa ba jornalista sira, iha Palasio Governu.

Iha fatin hanesan, Vise Ministru Administrasaun Estatál (MAE), Tomás do Rosário Cabral reforsa rezolusaun ne’e koalia kona-bá pagamentu subsídiu ba autoridade munisipál sira tanba sira iha direitu atu simu durante sira nia mandatu tinan rua, hahú hosi 1 Setembru 2016 no sei kontitua ba 2018, bazeia ba aprovasaun rezolusaun governu.

Entretantu, governu sentrál entrega ona poder deskonsentrasaun administrativa ba programa integradu dezenvolvimentu munisipál ho osan hamutuk 84 milões ba munisípiu 12, enkuantu governu sentrál fo apoiu no asisténsia téknika ba implementasaun programa sira.

(Jornalista : Zezito Silva, Editór : Manuel Pinto)

HUSIK IDA HATÁN