Lú Olo: Líder Istóriku Tenke Hamutuk Hateke Ba Oin

0
169
Prezidente Repúblika, Francisco Guterres bainhira sorumutu ho líder istóriku nu'udar Sekretáriu Jerál Partidu FRETILIN, Marí Alkatiri iha Palásiu Prezidénsia Repúblika, kuarta horsehik. Imajen Mídia Palásiu PR.

DILI, (TATOLI) – Prezidente Repúblika, Francisco Guterres Lú Olo hateten mensajen hosi povu nia votu hatudu katak povu kontinua fó konfiansa ba líder istóriku sira ne’ebé mai hosi rezisténsia no signifika povu hakarak líder istóriku sira tenke hamutuk atu hateke ba oin.

“Povu transmite ninia sentimentu no vontade boot teb-tebes ne’ebé hatudu iha rezultadu eleisaun. Povu hateten ba líder sira katak tempu to’o ona atu imi politiku sira túr hamutuk atu kaer ukun ho di’ak hodi responde povu nia nesesidade”, hatutan Lú Olo liuhosi mídia Palásiu Prezidensiál ne’ebé ajénsia Tatoli asesu, ohin.

Durante hasoru malu ho reprezentante partidu lima ne’ebé hetan asentu iha Parlamentu Nasionál hanesan Frente Revolusionariu Timor-Leste Indepéndente (FRETILIN), Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP), Partidu Demokrátiku (PD) no Kmanek Haburas Unidade Nasionál Timor Oan (KHUNTO) durante loron rua (26 to’o 27 jullu) iha Palásiu Prezidénsia Repúblika, Bairu Pité.

Sorumutu ho faze ba formasaun governu, tuir esperansa Xefe Estadu mak tenke metin no dura ba tinan lima nia laran atu hatan ba povu nia nesesidade.

Tanba ne’e, Lú Olo hato’o opsaun ba líder partidu polítiku sira relasiona ho formasaun governu iha futuru maka governu ho grande inkluzaun, governu ho koligasaun no akordu ba insidénsia parlamentár.

Enkontru ne’ebé hala’o ho líder partidu polítiku ho objetivu halo reflesaun kle’an kona-ba povu nia mensajen ho votus ne’ebé sira (povu) fó ba partidu polítiku sira.

Jornalista: Xisto Freitas

Editora: Rita Almeida

HUSIK IDA HATÁN