Liga Koneksaun Parseiru-Benifisiáriu, MTAK Lansa Website

0
64

DILI (TATOLI) – Ministériu Turizmu, Arte no Kultura (MTAK), Ohin, Kuarta (19/07), iha  Sentru Konvensaun Dili (CCD-sigla Portugues) lansa ona website ho enderesu www.cbet-timorleste.com no brosur ho objektivu fó oportunidade ajensia viajen no parseiru dezenvolvimentu sira atu estabelese koneksaun entre benifisiáriu sira.

Diretór Nasionál Merkadu Turizmu no Relasaun Internasionál (DNMTRI), José Dias Quintas hateten website no brosura kona-bá ekoturizmu baze komunitária no komunidade sira bele asesu ba merkadu.

“Projeitu ne’e, oinsa komunidade lokál bele promove sira nia negósiu kiik médiu impresa hanesan restaurante kiik sira, produsaun artezenatu, grupu sira halo matadalan no seluk tan, sira ne’e mak sai hanesan ekoturismu base komunitária,” José Dias Quintas haktuir iha ninian intervensaun iha CCD.

Nia esplika, website ne’ebé lansa, iha konsetu ekoturizmu base komunitária ho informasaun munisípiu sira, artezanatu, restaurante, no atividade saida mak bele halo iha munisípiu refere.

Website ne’e mós iha informasaun konaba ajensia viajen sira atu oinsa halo ligasaun ho ita nia maluk sira ne’ebé harii ekoturizmu base komunitária.

Kona-bá brosura iha tipu haat, nia kontiudu kona-bá viajen no informasaun, karik ba munisípiu ida saida mak presiza sira halo.

Iha parte selu José konsidera asesu ba merkadu mak sé sai dezafiu boot ida tamba haree ba kapasidade no rekursu atu  oinsa atu investe.

Iha fatin hanesan, Alexandre de Araújo agradese ba ekipa MTAK tamba hahu halo promosaun hodi lansa brosura no website, nune’e turista sira bele konhese diak liutan no bele hetan asesu ba merkadu turizmu no servisu ne’ebé hahuu lao kapas ona.

“Hein katak kolaborasaun servisu hamutuk MTAK bele lao diak liu tan, hodi bele kria ekoturizmu base komunitária ne’ebé sustentável liu hodi nune’e benifísiu ba povu timor. Mina bele maran maibé turizmu sei la maran”, Alexandre katak.

Entretantu, programa estabelisementu website, treinamentu ba staf no kriasaun brosura tipu haat ne’e gasta ona osan hamutuk US$ 28.348 ne’ebé finansia husi governu korea liuhosi Ministériu kultura, desportu no turizmu governu no apóiu husi organizasaun mundiál turizmu nasoens unidas nian (UNWTO – United Nations World Tourism Organization).

(Jornalista: Julia Chatarina, Editór : Manuel Pinto)

 

HUSIK IDA HATÁN