Letemumu Fasilita Sentru Votasaun Rua Hodi Evita Komunidade La’o Kilómetru Sia

0
65
Eleitór sira forma hodi ezerse direitu demokrátiku. Foto Tatoli/António Goncalves

KELIKAI, (TATOLI) – Sufrájiu parlamentár 2017 iha suku Letemumu hafahe ba sentru votasaun rua tanba suku ne’e maiór pepolusaun entre suku sira iha postu administrativu Kelikai, autoridade munisipál Baukau hodi evita komunidade la’o ho distánsia dook husi kilómetru sia atubele to’o iha sentru votasaun.

Xefe Suku Letemumu, Paulo Morreira Soares hatete tanba distánsia husi aldeia Manumé-Uaidora ne’e iha liu foho Matebian okos no dook nomós ferik-katuas sira ne’ebé la’o labele lamai vota, tanba ne’e habelar tan sentru votasaun iha aldeia Laumana ho aumenta sentru votasaun ida iha suku nian.

“Atu komunidade bele partisipa iha prosesu demokrasia ho di’ak. Iha Eleisaun Prezidensiál lakonsege koloka iha Laumana maibé ohin ne’e bele loke iha ne’ebá”, Paulo katak iha Suku Letemumu, ohin.

Brigada Sentru Votasaun Suku Letemumu, Armindo Sarmento hatete dezde eleisaun iha 2002 komunidade hamutuk ho autoridade lokál sira hakarak loke tan sentru votasaun ida ba suku nian.

“Ita iha Kelikai ne’e maioria depois envezde área ne’e besik malu maibé aldeia lima ne’e sikat leet fali suku balun no aldeia ida ne’ebé baliza fali ho Postu Administrativu Baguia, entaun iha 2002, 2007 ne’e STAE lakonsege realiza, iha eleisaun parlamentár agora ne’e mak tau iha Laumana”.

Brigada ne’e relata maski sentru votasaun iha rua no loke iha tuku 7:00 dadeer maibé kompara ho eleisaun prezidensiál maibé partisipante eleitór ladún másimu hanesan eleisaun prezidensiál nian.

“Ladún hatene karik orsida mak balun sei mai karik maibé ita kompara lahanesan uluk. Ha’u hanesan observa de’it komunidade balun ko’alia katak ema balun lakohi atu mai vota tanba transporte no ha’u mós suku ida ne’e nia oan, ita konese malu hatene katak ema balun lamai  no ha’u-nia aldeia rasik ema balun lama tanba de’it transporte ne’ebé difikulta sira”.

Numéru eleitorál iha suku Letemumu rasik iha 2.015 husi aldeia lima hanesan Lebenei, Laumana, Ruta, Manumé no Uai-Dora.

Jornalista: Maria Auxiliadora

Editora: Rita Almeida

HUSIK IDA HATÁN