Lere Preokupa Situasaun Veteranu iha F-FDTL

0
146
Majór Jenerál Lere Anan Timur ko´alia ba jornalista sira iha Palásiu Prezidénsia Repúblika, kuarta ne´e.

DILI (TATOLI)—Majór Jenerál FALINTIL-Forsa Defeza Timor-Leste, Lere Anan Timur, preokupa situasaun veteranu sira hamutuk 27 ne´ebé maka iha tinan 2015 liu-ba reforma ona hosi instituisaun FALINTIL-Forsa Defeza Timor-Leste (F-FDTL).

Nia haktuir katak veteranu hirak ne´e nia moris iha inkondisaun nia laran tanba seidauk iha polítika ida oinsá atu bele garante sira nia moris iha vida sivíl.

“Ami preokupa ba sira nia situasaun ekonómika. Tanba tinan 24 ami iha ailaran preokupa de´it ba funu, entaun ami solteiru hotu. Ami foin mai harii família iha tinan 15 nia laran. Ami nia oan na´in 5 ka 6 ona, maibé iha parte ida ami nia idade avansa ba dadauk. Estadu atu rezolve problema ne´e, liu-liu ami nia oan sira nia futuru oinsá?,” eis gerileiru hato´o asuntu ne´e ba jornalista sira iha Palásiu Prezidénsia Repúblika, Bairu-Pité, Dili, kuarta ne´e, hafoin ramata inkontru ho Xefi Estadu Lú-Olo.

Lere mós kestiona kona-ba estatutu FALINTIL iha instituisaun FDTL ne´e sei mantein ka halakon bainhira veteranu sira iha FDTL ne´e reformadu ona. “Ko´alia kona-ba instituisaun F/FDTL, signifika katak lei ne´e tenki abranje ida ne´e. Katak, kuandu ami sai ne´e FALINTIL/FDTL nafatin ka hela FDTL de´it,” nia dehan.

Majór Jenerál haktuir katak Prezidenti Repúblika mós preokupa kestaun refere no buka hela tempu ida atu deskuti asuntu ne´e ho instituisaun kompetente (governu) para bele valoriza veteranu sira ne´ebé reforma ona hosi F-FDTL.

(Jornalista: Xisto Freitas, Editór : Manuel Pinto)

 

HUSIK IDA HATÁN