Lei La Bandu Uza Atributu Rezisténsia iha Kampaña

0
40
Prezidente Komisaun Nasionál Eleisaun, Alcino Barris.

DILI (TATOLI)—Prezidenti Komisaun Nasionál Eleisaun (CNE), Alcino Barris esplika katak lei la bandu partidu polítiku sira uza atributu no figura rezisténsia iha kampaña eleisaun parlamentár.

“Lei Eleitorál Nú. 9/17 no Lei Nú. 2/2016 temi de´it katak labele uza Atributu Rezisténsia no Veternus pur eskrita, la´ós imajen. Lei la dehan katak labele uza imajen,” Barris dehan kestaun ne´e ba jornalista sira iha Palásiu Prezidénsia Repúblika, Bairu-Pité, Dili, tersa ne´e, hodi hatán líder partidu polítiku balun ne´ebé husu atu partidu polítiku sira labele uza atributu rezisténsia iha kampaña eleisaun parlamentár.

Nia dehan lei só bandu uzu atributu nasionál iha kampaña. Nia fó ezemplu, sé tau hena ida no hena ne´e hanesan farda F-FDTL no PNTL nian, ne´e labele tanba ne´e atributu nasionál. Maibé, Alcino informa, farda ida uluk tempu portugés nian, bele uza tanba ne´e hena de´it ida. Importante maka lei dehan labele eskrita ka labele iha palavras.

“Ami konsulta ho asesór no jurídiku sira hotu maibé ami la konsege hetan lei ida bandu uzu atributu refere. Tanba ne´e, Komisaun Nasionál Eleisaun laiha forsa atu bandu,” Prezidenti Komisaun Nasionál Eleisaun haklaken.

Antes ne’e Prezidenti Partidu Libertasaun Popular (PLP) Taur Matan Ruak kestiona kona-bá imajem Prezidenti Partidu CNRT Kay Rala Xanana Gusmão ne’ebé nia retratu tau iha buletin votus hatais farda militar no taka bonea mean.

(Jornalista: Xisto Freitas, Editór : Manuel Pinto)

HUSIK IDA HATÁN