Kontinuasaun PNDS Depende Desizaun Povu

0
50

DILI, (TATOLI) – Vise-ministru estatál, Tomas Cabral hatete PNDS (Programa Nasionál Dezenvolvimentu Suku) ne’e povu rasik mak husu no implementa husi povu ho partisipasaun populár tanba ne’e programa ne’e atu kontinua ka la’e depende povu.

“Planeamentu no investimentu ne’e povu rasik mak halo. Osan PNDS nian hela iha konta bankária suku nian, sira hatama relatóriu mai iha leten”, Cabral esplika ba preokupasaun partidu polítiku sira kona-ba PNDS iha otél Novo Turizmu, Lecidere, tersa (11/7) bainhira partisipa debate públiku entre partidu sira.

Relatóriu ne’e molok mai nasionál, iha konsellu suku, xefe suku ho nia ekipa ne’ebé apoiu ba prosesu ne’e halo relatóriu ba komunidade. “Projetu ne’e, barak halai liu ba infraestrutura bázika”, informa.

Kona-ba susesu ka la susesu, ne’e partisipasaun populár. “Programa ne’e husi aldeia no lori ba diskute iha suku hodi haree programa prioridade. Osan ne’e, sira rasik jere ba atividade administrativu, levantamentu no diskusaun”.

Prosesu implementasaun hetan asisténsia téknika husi rai li’ur ho apoiu ajénsia internasionál hodi halo dezeñu tékniku.

Fallansu ne’ebé akontese tanba implementa husi komunidade, komunidade mak halo levantamentu dadus, entaun estudu viabilidade balun la-kumpleta.

“Maibé, diskusaun no  partisipasaun populár ne’e, ita hakarak ida ne’e tanba ita hakarak ita-nia komunidade partisipa iha dezenvolvimentu”, dehan eis diretór STAE (Sekretariadu Tékniku Administrasaun Eleitorál) ne’e.

Hodi haktuir PNDS ne’e programa nasionál no implementa iha kintu governu konstitusionál no hetan apoiu husi ajénsia internasionál.

“Se povu konsidera ne’e di’ak, se mak bele ukun, bele kontinua. Programa ne’e povu nian, povu mak hala’o no benefísiu ba povu rasik”, konklui.

Entretantu, PNDS mak inisiativa ida hosi Governu ne’ebé fó kbiit ba komunidade atu hili, dezeñu no harii projetu infraestrutura eskala ki’ik iha sira-nia suku.

PNDS ne’e lidera hosi Ministériu Administrasaun Estatál (MAE) no Ministériu Finansa (MF) iha parseria ho ministériu sira seluk.

Suku sira simu subvensaun anuál ida ho montante entre 40,000 to’o 70,000 dolár diretamente husi governu hodi halo planu, harii no maneja rasik sira-nia projetu infra-estrutura eskala ki’ik tuir suku nia prioridade dezenvolvimentu.

Infra-estrutura ne’ebé bele harii ka renova inklui sistema bee, estrada lokál, sentru komunitáriu ka eskola sira.

Informasaun relevante bele asesu iha ne’e: http://www.pnds.gov.tl/website/tn/kona-ba-pnds/

Jornalista: Rafy Belo

Editora: Rita Almeida

HUSIK IDA HATÁN