Kontentór Ida Husi Timor South Laiha Autorizasaun Husi Ministériu

0
62
Kontentór sira ne’e ida mak tau ekipamentu peska nian no 19 seluk ekipamentu agrikultura nian.

DILI, (TATOLI) – Xefe Departamentu Kaptura, Lisensiamentu, Pós-kolleta no Jestaun Kualidade Peska, Ministériu Agrikultura no Peska (MAP), Joni Freitas informa kontentór ida ne’ebé prinxe ho ekipamentu peska ne’ebé hatama husi kompañia Timor South husi Xina laiha autorizasaun husi ministériu, nune’e halo notifikasaun ba Alfándega atu haruka fali bá nasaun orijen.

Tanba tuir lei Alfándega nian katak la re-esporta maka prosesu atu filafali ba propriedade Estadu nian, tanba kontentór ne’e tama mai Portu Dili liu ona tempu ne’ebé determina no bazeia ba dekretu lei númeru 11/2004 iha artigu 63 kuandu liu ona loron 90 automátikamente sasán hirak ne’e afavór ba Estadu nune’e kontentór ne’e Alfándega apreende (foti)  no iha obrigasaun no atu loke hodi hatene sasán saida mak iha laran.

“Ami haree iha motór ró laran rua, motór uza ba transporte hamutuk sia, maibé uluk sira hatete motór sira ne’e dehan sira-nia traballadór mak uza, depois sira dehan atu iha mós motór johnson ho ró, realidade ita haree kontentór laran laiha”, Joni informa iha Portu Dili hafoin Alfándega loke kontentór ida ba Diresaun Jerál Peska no 19 ba Diresaun Nasionál Agrikultura, Ortikultura no Estensaun, ohin iha Portu Dili.

Motór sia ne’e ho marka Dalong no Ginfu nomós hand tractor nune’e automátika Alfándega foti no prosesu ikus mak MAP bá Alfándega hodi halo prosesa kona-ba pagamentu iha Alfándega no sei fó tempu para atu halo prosesu ba ekipamentu ne’e.

Joni relata katak sasán sira ne’e husi Kompañia Timor South Fisheries no konforme sira-nia proposta katak atu halo portu peska nian iha Laleia no parke industriál no fatin sira ne’e atu tau Kay Rala Xanana Gusmão nia naran, despois haree lei no konsulta ho SERVE hatete katak naran ema boot nian labele tau arbiru.

“Mas nia fallansu mak sasán hatama sein autorizasaun tanba ne’e mak ami-nia ministru haruka tenke re-esporta depois kompañia ne’e mos ami hapara, ne’ebé lahalo atividade peska”.

Sobre materiál iha kontentór laran ne’ebé ohin Alfándega loke ona, Diresaun Jerál no Peska sei bele uza maibé sei haree ba prosedimentu legál tanba sasán sira ne’e presiza atu ajuda peskadór sira.

Diretór Nasionál Operasaun Alfándega, Julio José Ximenes hatete kontentór ne’e loke ona no Alfándega sei rejistu no submete ba Ministra Finansa depois sei toma desizaun ikus no kontentór sne’e responsavel Alfándega nian, nune’e kontentór mantein iha Portu.

Bazeia ba dokumentu manifestu sasán ne’e mensiona katak ekipamentu ba MAP nian maibé sobre detallu to’o ohin loron Alfándega seidauk hetan deskrisaun kona-ba materiál sira ne’ebé importa husi Xina ne’e.

Jornalista: Maria Auxiliadora

Editora: Rita Almeida

HUSIK IDA HATÁN