Konservasaun Flora no Faun, KFF Kuda Ona Ai-Parapa 4.000

0
62
Viveiru Ai-Parapa. Foto/KFF.

DILI (TATOLI)-Organizasaun Naun Governamentál (ONG) Konservasaun Flora no Fauna (KFF) durante ne’e kuda ona ai-parapa hamutuK rihun haat (4.000), iha munisípiu Likisá área Ulmera no Autoridade Munisipál Dili liuliu área Hera no Metinaru.

Prezidente KFF, Alito Rosa hatete hosi ai-parapa ne’ebé kuda, KFF mós iha viveiru ne’ebé sei iha hamutuk 20.000 atu prepara ba kuda iha fatin sira ne’ebé identifikadu hanesan iha munisípiu Manatutu no fatin sira seluk ne’ebé hetan estragu maka’as.

Prezidente KFF, Alito Rosa. Foto/KFF.

Atividade Kuda ai iha área Metinaru KFF hetan apoiu husi Pertamina Internasionál Pantai kelapa, parte Ulumera servisu serbisu hamutuk ho Ajénsia United Nations Development Programme (UNDP) no iha área Hera KFF mak kuda mesak. Aleinde ne’e KFF ajuda komunidade Ulumera atu sira bele hala’o mós programa kona-ba Mangrove nian.

“KFF iha ona planu atu kontinua kuda Ai-Parapa, maibé seidauk iha orsamentu hodi bele apoiu atividade ne’e rasik. Tanba KFF hamriik ona hanesan ONG nasionál maibé seidauk iha doadór ne’ebé permanente atu ajuda,”,\ Alito informa via facebook, ohin.

Daudaun ne’e KFF hala’o hela peskiza ba área sira ne’ebé iha Ai-Parapa, tanba iha Timor-Leste kuaze Ai-Parapa barak liu iha munisípiu Manatutu ne’ebé luan liu kompara ho munisípiu sira seluk.

Maski KFF servisu hamutuk ho UNDP hodi halo kampaña kona-ba “one Child one Mangrove” iha área Ulmera no Metinaru maibé sei buka nafatin pareseiru iha atividade ne’e.

“Agora daudaun ami buka parseiru liuliu governu Timor-Leste maibé seidauk iha sinál ruma tanba ne’e mak ami sempre koko buka ema indíviduu ka kompañia sira ne’ebé iha interese ba asuntu ambiente,” Alito dehan.

KFF mós iha membru permanente hamutuk na’in-sanulu no volutáriu hamutuk sanulu-resin-lima. Ba futuru KFF hakarak aumenta ema volutáriu barak husi estudante universitáriu atubele iha interese ba natureza.

Iha futuru KFF la’ós foku de’it ba ai-parapa, maibé haree mós ba área protejida sira hanesan parke nasionál sira iha Timor-Leste.

(Jornalista : Maria Auxiliadora, Editór : Manuel Pinto)

HUSIK IDA HATÁN