KI Husu Jornalista Kaer Metin Kode Étika

0
30
Prezidente Konsellu Imprensa hamutuk ho membru sira halo konferénsia imprensa iha Kintal Boot, ohin. Foto mídia KI

DILI, (TATOLI) – Konsellu Imprensa (KI) husu ba jornalisa sira atu kaer metin kode étika no mantein nafatin independénsia iha kampaña parlamentár.

“Asuntu tolu mak KI atu hato’o, ida mak prekupasaun konaba fake news (notísia falsu), ezisténsia konsellu imprensa konaba mídia sira atu mantein nafatin independénsia editoriál hodi garante informasaun ba públiku”, hatete Prezidente KI, Virgilio Guterres ba jornalista sira iha sala plenária KI, Kintal Boot, ohin.

Konsellu ne’e mós husu ba órgaun komunikasaun sosiál atu halo tratamentu ne’ebé justu ba kontestante sira hotu.

Nia haktuir, KI identifika katak notísia falsu hosi blog sai referénsia ba mídia no jornalista atu kestiona lider polítiku. Buat hirak ne’e, bele hamosu tensaun nesessáriu entre líder sira.

Hodi dehan tan, partidu polítiku balun hato’o ona preukupasaun konaba notísia falsu ne’e. Iha meius komunikasaun online ida ne’ebé ninia kontiudu bazeia ba faktu fiktivu ne’ebé mak hanesan politikatimor.blogspot.com.

“Notísia ne’ebé tun ho blog ne’e, ema hakerek ho estrutura notísia ne’ebé di’ak tebes, maibé faktu no dadus mak nia refere ne’e mesak imaginativu, líder sira la-halo deklarasaun hanesan blog ne’e hakerek”, katak.

Nune’e nia fó hanoin ba jornalista sira, semana ikus kampaña no ba oin labele halo notísia bazeia ba referénsia ne’ebé fontes la-klaru, liu-liu notísia falsu. KI husu ba jornalista sira atu kaer metin ba kode étika jornalista hodi garante independénsia editoriál, nune’e bele fó informasaun loos ba públiku.

“Di’ak liu jornalista sira husu pergunta ba fonte bazeia ba faktus no dadus rasik, labele bazeia ba notísia ne’ebé mai hosi sosiál mídia no blog sira”.

Konaba garante independénsia editoriál, Virgilio afirma KI akompaña katak mídia barak fó espasu ba partidu polítiku sira atu tau sira nia publisidade.

Nune’e KI husu atu fó espasu ba públiku atu hetan informasaun no labele tau publisidade partidu polítiku. “Notísia sira pakote informasaun nia kontinua tau informasaun”.

Nia mós fó hanoin, foto ne’ebé mídia sira tau iha notísia labele tau spanduk partidu polítiku sira. Foto sira uza ba notísia tenke uza foto hosi ita nia obra rasik. Iha mós notísia ne’ebé foto ho notísia la koresponde. Notisia labele uza slogan partidu sai notísia.

Ikus mai, kompeténsia mídia hotu-hotu nian, maibé Prezidente KI husu atu órgaun komunikasaun sosiál sira bele konsidera atu fó espasu mós ba partidu polítiku eleitorál sira ne’ebé laiha rekursu finanseiru naton atu selu espasu sira iha radiu, televizaun no jornál.

“Pelu menus fó mós espasu ba sira atu tau sira nia publisidade tuir kapasidade sira nia, atu nune’e bele fó tratamentu ne’ebé justu ba publisidade”, katak tan.

Tuir Virgilio, sidauk iha lei ida atu regula publisidade partidu polítika iha eleisaun jeral, tamba ne’e CI atu fó hanoin ba orgaun komunikasaun sira atu halo tratamentu justu ba partidu polítiku sira, nune’e eleitór sira bele hetan informasaun naton, komprende no foti desizaun ho konsiénsia no kualidade.

Jornalista: Julia Chatarina

Editora: Rita Almeida

HUSIK IDA HATÁN