KHUNTO Prioritiza Programa Lima

0
200
Lideransa KHUNTO halo ninia komisiu iha Tasi-Tolu, ohin. Foto Tatoli/António Goncalves

DILI, (TATOLI) – Partidu Kmanek Haburas Unidade Nasionál Timor Oan (KHUNTO) ho númeru sorteiu 3 iha súfrájiu (eleisaun) parlamentár 2017 iha nia alvu prinsipál bainhira manán mak sei fó prioridade liu ba setór agrikultura, edukasaun, saúde no kombate korrupsaun no hadi’a dalan ba moris di’ak.
Prezidente Partidu Khunto, Armanda Berta dos Santos hatete partidu iha preparasaun  kuandu povu fó fiar mak sei implementa programa sira liuliu mak korrupsaun.

“Sé mak atu tuur iha kargu Primeiru-Ministru, hahú husi xefe suku to’o ema sira ne’ebé kaer pasta Governu karik sei lori bá halo juramentu iha Ramelau tutun atu nune’e bele halakon korrupsaun iha rai doben ida ne’e”, hatete Armanda iha Tasi-Tolu, ohin.

Atu haburas korrupsaun iha dalan oioin tanba ne’e halo juramentu iha foho ramelau para tauk tanba korrupsaun ne’e atu oho povu no nasaun.

Aleinde ne’e alvu seluk mak atu hadi’a estrada iha rai-laran bainhira Khunto hetan fiar maibé sei haree ba orsamentu ne’ebé mak iha tanba duké gasta osan ba buat seluk di’ak liu hadi’a Timor-Leste laran tomak.

“Ita labele hadi’a iha munisípiu de’it mas tuun ba postu, suku no aldeia sira ho di’ak liután tanba estrada ida ne’e ba ema hotu liuliu agrikultór sira para sira-nia bele lori produtu  mai Vila la’o ho di’ak”.

Ba partidu Khunto, unidade nasionál importante tebes tanba ho unidade mak sai aliserse ida ne’ebé di’ak hodi hametin no haburas país ida hanesan jerasaun tuan sira proklama tiha ona no sai eransa ba jerasaun foun Timór nian oinsá hamutuk bele kria unidade, pás no estabilidade.

Sekretáriu Jerál Partidu Khunto, José Agostinho da Silva insisti, boa governasaun iha Governu katak sé mak sai membru Konsellu Ministru tenke moos husu korrupsaun.

“Oinsá nia komete iha korrupsaun entaun nia dignidade laiha ona, tanba ne’e Partidu Khunto nia estratejia atu kombate korrupsaun mak lori governante sira ba juramentu iha foho Ramelau, sé ita fó kompromisu onra baibain de’it iha Palásiu Governu, ohin nia simu tomada pose, ohin kalan nia planeia aban ne’e no durante ha’u-nia mandatu tinan lima tenke hariku ha’u-nia aan ho povu nia osan”,

Tuir nia, Timór ne’e nia tauk mak kultura tanba kultura laiha toleránsia nune’e ho juramentu iha foho Ramelau halo ema tauk ona halo korrupsaun.

Jornalista: Maria Auxiliadora

Editora: Rita Almeida

HUSIK IDA HATÁN