Kazu João Câncio TR Viola Prinsipiu Kontraditoriu

0
203
João Câncio da Costa Freitas

DILI (TATOLI)—Tribunál Rekursu (TR) komete violasaun ba prinsipiu kontraditoriu tanba halo alterasaun juridika sein rona parte defesa bainhira akuza arguido João Câncio da Costa Freitas ho Artigu 274 Administrasaun danoza.

Advogado Jose M Guterres, konsidera TR halo violasaun ba prinsipiu kontraditoriu no mós prinsipiu konstituisaun RDTL kona-bá defende án bainhira hamonu dezisaun ba nia kliente João Câncio da Costa Freitas, iha loron Segunda (17/07) liu ba.

“Tuir lolos ne’e TR halo alterasaun tenki submete ba prinsipiu kontraditoriu, maibé realidade alterasaun juridika ba ami nia kliente sein  rona ami parte defesa. TR nega prinsipiu kontraditoriu no nega mós Konstituisaun RDTL kona-bá defende án,” Advogado Jose M Guterres kestiona ba jornalista sira iha nia edifisiu, Bairo Grilos, Dili, Segunda (24/07).

Iha fatin hanesan João Câncio konsidera dezisaun TR lori tristeza boot ba nia no familia. Nune’e mós infelismente TR lahalo referensia ba faktus katak projeito TV Edukasaun nian involve ajentes barak tebes la’ós João Câncio de’it.

“Triste boot mai ha’u no familia, tanba aleinde kadeia tinan hat fulan neen, ha’u mós tenki selu indemnizasaun ba estadu RDTL ho montante USD 1.410.000,00. Osan boot teb-tebes ne’e to’o ha’u nia jerasaun 2 ka 3 mós sei la selu kotu,” João Câncio haktuir ho triste.

Hodi esplika iha kazu TV Edukasaun nu’udar ministru nia mós konsege salva osan estadu hamutuk USD 1.060.000 fila hikas ba kofre estadu depois hatene tiha irregularidade sira ne’e mosu.

“Ha’u la estuda Direitu (Hukum) tanbasa absolve tiha ha’u hosi krime korrupsaun ka partisipasaun ekonomiku no negósiu, TR halo fali kondenasaun kona-bá kesalahan administrasi. Nu’udar sidadaun maske todan maibé ha’u kumpri,” João fó sai nia sentimentu.

No salienta iha kazu ne’e nia iha konsensia mós  tanba ne’e nu’udar ema fi’ar nain, nia fi’ar maromak sei horik ho nia. Infelismente Timor-Leste seidauk iha Tribunál Supremu nia la iha oportunidade atu defende án tan, maibé iha kazu TV Edukasaun João dehan “Ha’u la na’ok ka han matak.”

Paula Judit Alves, nu’udar fen kaben ba João Câncio fó sai la iha dalan seluk atu familia bele halo maibé sira sente katak dezisaun ne’ebé iha todan tebes ba sira.

“Ha’u sente todan tebes, la iha buat ida, ha’u entrega hotu ba Maromak no Maromak ho ami,” Paula fó sai nia todan.

To’o notisia ne’e tun parte João Câncio hein de’it ona tempu hodi kumpri dezisaun Tribunál maibé TR ofisialmente, iha Kinta (20/07) haruka ona karta notifikasaun ba parte defesa arguido Eis Ministru Edukasaun no tuir lei sura hosi loron notifikasaun durante loron lima ou bele sanuluresin lima arguido tenki hela ona iha prizaun.

Ekipa Kobertura)

 

 

 

 

 

HUSIK IDA HATÁN