“Katuas Ruin La Besi, Raan La Manas”

0
155
Foto espesiál. Foti husi: dpu.def.br

DILI (TATOLI)—Observadór Polítika Universidade Nacional Timor Lorosa’e (UNTL), Victor Soares sita proverbiu populár, “Katuas sira ruin la besi, raan la manas” katak ita-nia lider tuan sira sei to’o nia tempu atu deskansa tanba ne’e hanesan foinsa’e, jerasaun foun, ita buka aprende no hatudu nafatin maturidade nu’udar joven hodi kontribui ba paz.

“Joven sira ne’ebé enkaixa aan iha partidu polítiku sira tenke aprende nafatin, nune’e 2022 mai sira mós bele hola parte hodi sai lider hodi kompete, hatutan nafatin saida mak inan-aman no lideransa sira halo ona,” hateten observadór Victor Soares ba Ajénsia Tatoli, iha salaun CNE (Comissão Nacional das Eleições), Colmera, Díli, Tersa (18/07).

Sura loron atu tama ba eleisaun lejislativa hodi forma sétimu governu konstitusionál, partisipasaun joven sira nian di’ak no hatudu maturidade iha prosesu kampaña eleitorál hodi kontribui maka’as loos ba iha prosesu eleisaun lejislativa.

Sinal ida ne’e hatudu juventude sai hanesan autór prinsipál ba dezenvolvimentu nomós joven hanesan futuru ba nasaun. Entaun, otomatikamente, hanesan timoroan, joven idaidak sente tenke muda nia aan, aprende ho lider tuan sira no tempu to’o jerasaun foun sira atu ka’er, iha ona esperiénsia.

Bainhira joven sira aprende, bele iha esperiénsia jere instituisaun hothotu, tantu publiku nomós privada atu bele la’o di’ak atu bele kontribui ba prosesu dezenvolvimentu iha ita-nia rai laran.

Involvimentu juventude iha partidu polítika sira hola parte hodi aprende programa, vizaun no misaun partidu sira nian no ita nota katak joven sira respeita malu tebes tanba aprende ona husi esperiénsia pasada.

Iha tinan 1975 Partidu polítiku eziste maibé antes ne’e uma lisan, Timor-Leste eziste nanis. Nune’e timoroan hotu iha ligasaun fetosá umane. Entaun eleisaun prezidénsiál no kampaña ba eleisaun lejislativa, ita mesak organiza la iha intervensaun husi ONU, ida ne’e kapas tan la’o di’ak.

Suseso iha eleisaun rua ne’e hatudu ba Timor atu loke pájina foun ba ita-nia rain, hatudu ba ita-nia nasaun viziñu no hatudu ba mundu katak ita mós bele. Ita dezenvolve aan, kria paz no estabilidade hodi kontribui ba dezenvolvimentu nasionál.

Prosesu eleisaun hirak ne’e hotu iha tinan ida ne’e (2017) tinan ida ne’ebé hanesan tinan edukasaun tanba ne’e hanesan juventude, ita kaer valór paz hodi ba oin, ita hadi’a aan di’ak liutan.

Esperensia hatudu durante eleisaun prezidensiál no kampaña ba eleisaun lejislativa ne’ebé sei monu iha jullu 22 ne’e, situasaun la’o di’ak mezmu iha insidente balun, ida ne’e lisaun di’ak katak joven hahú prepara aan.

Estudante Universidade Orientál (UNITAL), Estevão Soares hateten katak joven sira barak kumprende ona kona-ba ezisténsia partidu polítiku no prosesu eleitorál. Tanba ida ne’e, partidu polítiku sira ne’ebé eleitu hodi forma parlamentu no governu bele kria kondisaun ba joven sira hodi asegura no kontribui nafatin ba paz no estabilidade,.

“Sira tenke loke oportunidade ba joven sira hanesan edukasaun naun-formál nomós loke kampu traballu ba sira (joven). Ida ne’e importante tebes,” hateten estudante fakuldade edukasaun departamentu inglés ne’e.

Hodi husu katak iha formasaun sétimu governu konstitusionál ne’e, espera bele kria kondisaun ne’ebé sustentável  no kria dezenvolvimentu ne’ebé iha sustentabilidade iha ita-nia rain, ba povu no ba ema hotu.

Hanesan joven, estudante semester lima husi UNITAL ne’e enkoraja mós joven sira seluk katak presiza inklina aan iha atividade sira ne’ebé ho hanoin kreativu no inovativu atu forma ita-nia karakter no transforma ita-nia atitude hodi envolve aan iha paz no dezenvolvimentu.

“Ita joven hanesan fini ida. Prepara ita-nian, tau ita-nia aan ba futuru liuhusi kria domin no dame ba malu hodi kria estabilidade,,” enkoraja foinsa’e ne’e hodi apela mós ba foinsa’e sira iha Timor-Leste laran tomak.

“Hatudu nafatin ita-nia komitmentu di’ak, transforma aan hanesan joven no banati tuir hahalok di’ak husi lider sira nune’e ita hametin liutan dame iha uma laran no sosiedade,”enkoraja tan estudante universitáriu husi munisípiu Viqueque ne’e.

(Jornalista: Rafy Belo, Editór : Manuel Pinto)

 

HUSIK IDA HATÁN