Karketu Dili FC Besik Hetan Vitória

0
94
Ekipa Karketu Dili FC. Imajen Mídia LFA

DILI, TATOLI) – Ekipa Karketu Dili FC, hakbesik dadaun ona ba títlu kampiaun Primeira Divizaun Liga Futeból Amadora (LFA) époka 2017, manán ho festa golu ba redi Cacusan FC ho skoru 9-1 iha jogu jornada 10 ne’ebé maka hala’o iha Estádiu Malibaka, Munisípiu Bobonaro, Domingu (30/7/17).

Vitória ne’e lori ekipa ne’ebé hetan treina hosi treinadór Chile, Simon Pablo, hadook án dadaun ona nia pontu hosi ekipa kampiaun primeira divizaun époka 2015/2016, Sport Laulara e Benfica, ne’ebé tenke simu rezultadu derrota ka lakon hosi ekipa As Ponta Leste iha jogu ne’ebé maka hala’o iha loron hanesan iha Estádiu Munisipál Baucau ho skoru 2-3.

Ho rezultadu ida ne’e maka lori ekipa Karketu Dili FC, lidera nafatin klasifikasaun provizóriu jornada 10 ho pontus 24 hosi jogu 10 ho manán 7, impata 3 no seidauk lakon, ka halo istória foun mós iha Liga Futeból Timor nian hanesan ekipa ne’ebé maka konsistenti durante jornada 10 no nunka hetan derrota no fó diferensia pontus 7 ba ekipa SLB, ne’ebé túr iha pozisaun segunda klasifikasaun.

Entretatu, Cacusan FC, nafatin okupa hikas pozisaun 5 ho pontus 12 hosi jogu 10, manán 2, impata 6 no lakon 2.

Festa golu ekipa Matak Malirin loke uluk hosi nia avansadu estranjeiru hosi Brazil Henrique Conceição iha minutu 12. Liu de’it minutu rua, Alan Leandro, jogadór hosi Brazil mós aumenta tan golu ba Karketu aproveita frakeiza ne’ebé maka iha parte defeza ekipa Cacusan FC.

Maske lakon golu rua iha minutu minutu ba dahuluk la hamonu mentalidade Cacusan FC, ne’ebé lokraik tenke serbisu maka’as hodi defende sira nia área hosi atake ne’ebé maka hala’o hosi jogadór Karketu Dili FC.

Tama ba minutu 18, Cacusan FC hamenus golu liuhosi nia avansadu Rofino Gama iha minutu 18. Antes primeira parte ramata, António Vega oferese golu ida tan ba Karketu iha minutu 40, hodi taka primeira parte jogu ekipa rua 3-1, ba Karketu Dili.

Tama ba segunda parte, jogadór Karketu Dili hahú hala’o kedas ataka ba área Cacusan FC ne’ebé lokoraik ne’e susar atu halo balansu ho jogadór Karketu nian. Jogu foin hala’o iha minutu ida alias tama ba 46, Henrique Conceição aumenta tan golu ba Karketu Dili no hanesan mós sinál ba ekipa refere hodi hala’o festa golu.

Iha minutu 68, Henrique Conceição halo hatrick. Liu minutu ida ka iha minutu 69, António Vega aumenta tan golu. Performa furak ne’ebé maka hatudu hosi jogadór Karketu Dili nian sai hanesan mehi a’at ba ekipa Cacusan FC, ne’ebé tenke simu golu tui-tuir malu.

Henrique Conceição aumenta tan golu ba dala haat iha minutu 79, hodi lori jogadór refere provizóriu lidera tabela provizóriu klasifikasaun mellór markadór ho golu 10. Tama ba minutu 81, António Vega ne’ebé ho nasionalidade Chile mós lakohi lakon hodi aumenta tan golu no halo hatrick iha lokraik ne’e nomós lori nia hakbesik ba nia kompatriota iha tabela klasifikasaun mellór markadór ho golu 9.

Golu ikus hosi Karketu Dili FC, taka hosi jogadór meiu kampu Osvaldo Oscar iha minutu 89, hodi taka jogu lokoraik ne’e ho skoru 9-1.

Iha parte seluk, derrota ne’ebé hetan hosi ekipa SLB hafoin jogu lakon ho AS Ponta Leste iha Estádiu Munisipál Baucau, la muda pozisaun ekipa SLB hosi segunda klasifikasaun ho pontus 17, hosi jogu 10, manán 5, impata 2 no lakon 3. AS Ponta Leste haksoit sa’e ba pozisaun 3, ne’ebé antes ne’e okupa hosi Carsae FC ho pontus 15, hosi jogu 10, manán 4, impata 3 no lakon 3.

Golu SLB hatama hosi jogadór estranjeiru Boateng iha minutu 44, Denilson Araújo 45+1. Enkuantu, Golu AS  Ponta Leste, hatama hosi Ezequel Fernandes iha minutu 17, Edmond Hezel 77 no Lamberto Gama 87.

Jornalista: Xisto Freitas

Editora: Rita Almeida

HUSIK IDA HATÁN