Joven Nu´udar Piramida Sosiál

0
133
Prezidente Repúblika Francisco Guterres, Lú-Olo halo abertura sorumutu meza-kabuar “Ba Ajenda Ida Demokrátika husi Jerasaun iha Àsia-Oseánia”. Foto Tatoli: António Gonçalves

DILI (TATOLI)—Xefe Estadu Francisco Guterres, Lú-Olo haklaken ba eis-prezidente repúblika no xefe governu husi Indonézia, Nova Zelandia, Bhutan, Nepal no embaixadór sira husi nasaun oioin katak Timor-Leste atu atinji objetivu dezenvolvimentu husu ba nia sidadaun sira-nia dedikasaun, komitmentu no esforsu inklui promove partisipasaun joven sira.

“Iha ami-nia sosiedade tradisionál, joven nu´udar piramida sosiál liuhusi faktu simples hodi sai joven. Ha´u defensór ida ba tradisaun. Ha´u hanoin katak ami-nia tradisaun ankora esensiál ba ami-nia identidade iha mudansa mundu globál ne´ebé lais, ho baliza kultura ne´ebé fraku,” esplika prezidente Lú-Olo, iha salaun MNEC, Praia dos Coqueiros, Díli, horseik.

Hodi hatutan katak dalan di´ak atu salva-guarda identidade no tradisaun mak ajuda joven sira atu adapta ho di´ak no akompaña dezafiu ohin loron.

Maske nune´e, ajenda jerasaun demokrasia tuir mai tenke marka ho dialogu interjerasionál ho kapasidade jerasaun tuan atu valoriza prioridade foun. “Ida ne´e la fásil. Dezafiu boot tebes,” suspira xefe estadu ne´ebé simu pose iha 20 maiu 2017, loron restaurasaun indepedénsia nian ne´e.

Nia hatutan, Timor-Leste esperiénsia ba prosesu urbanizasaun ida ne´ebé lais tebes. Hakat rápidu ida ne´e, aumenta risku ba eskluzaun sosiál, iha ambiente ne´ebe muda husi suku no família.

Ida ne´e nu´udar pontu inisiál iha prosesu harii nasaun. Ao contrário, ita moris iha ambiente teknolojia komunikasaun ne´ebé favorese ba fragmentasaun informasaun no konsekuentemente ba sosiedade.

“Internet bele asesu ho fásil ba koñesimentu, maibé ida ne´e mós reprezenta kompetisaun feroz ba métodu tradisionál asesu informasaun.Iha suku, iha família no iha eskola,” katak xefe estadu ne´e.

Hodi esplika katak joven asesu informasaun, hasai ona husi izolasaun no mesak, liuhusi komputadór rasik no telefone sira ne´ebé tau iha sira-nia bolsu, potensiál ekstraordináriu iha edukasaun no hasa´e sira-nia koñesimentu. Iha tempu hanesan, hatudu ho liafuan seluk katak dezafiu ba estabelesimentu ajenda komun nu´udar sidadaun.

Ita tenke foti desvantajen husi potensiál boot ba asesu jerasaun foun ba iha koñesimentu globál no aprende oinsa atu uza poténsia ne´e hodi promove ajenda demokrasia, nakloke ba preokupasaun, nesesidade no interese jerasaun foun.

In-esperiénsia husi jerasaun foun halo sira fásil sai alvu ba promesa falsa. Ida ne´e fásil tebes atu krítika no halo. Demokrasia no inkluzaun husi ita-nia sidadaun joven sira nu´udar instrumentu importante atu prevene interese grupu ka ajenda sira ne´ebé la demokrátika husi foti desvantajen iha jerasaun foun.

Sufisiente hodi nota katak kompozisaun husi idade governu, konsellu diretór sira no fakuldade sira iha universidade rai laran, lideransa partidu polítiku no emprezáriu timoroan barak refleta klaramente papel kresente dezempeñadu husi jerasaun dékada-70 ba jerasaun dékada-90.

“Ha’u fiar katak, sosiedade sira hotu, ne’e partikularmente desvantajen ba tranzisaun jerasionál hodi hola fatin iha graduál no maneira pragmátika ida. Iha dialógu ne’ebé ha’u ko’alia implika kapasidade sira hodi reune jerasaun diferente hodi koopera hamutuk ihe servisu bem comum,” nia akresenta.

Hodi hatutan, dialógu interjerasionál nu’udar dalan ne’ebé ita liuhusi hodi maksimiza kontribuisaun jerasaun sira nian ba objetivu nasionál, indepedentemente husi sosiedade diferente sertamente hasoru forma ketak hodi realiza kooperasaun interjerasionál ida ne’e.

Defaktu, dialógu interjerasionál hakat liu fronteira, no ajuda dezafiu grave kolaborativu ne’ebé sistema internasionál hasoru. Tanba ida ne’e, prezidente akolla ho kaloroza ba obra no realizasaun ne’ebé hala’o liuhusi asaun estadista seniór sira husi Clube de Madrid, ne’ebé nia esperiénsia no koñesimentu kontribui frekuentemente ba konsília diferensa sira, reduz tensaun no prevene konflitu iha rejiun sira barak iha mundu.

Eis-xefe estadu no governu representa rezerva insubstituível experiénsia no koñesimentu hodi servi nasaun no, hetok ba komunidade globál.”Timor-Leste kontente tanba entre estadista sira fó nia koñesimentu no esperiénsia sólida ba servisu paz nian, estabilidade no dezenvolvimentu,” tenik prezidente hodi apresia.

Entretantu, partisipante espesiál iha sorumutu meza-kabuar “Ba Ajenda Ida Demokrátika husi Jerasaun iha Àsia-Oseánia” ne´e mak eis-prezidente Indonézia, Susilo Bambang Yudhoyono, eis-primeiru-ministru Nova Zelandia, Jennifer-Mary Shipley.

Inklui, eis-primeiru-ministru Bhutan, Jigmi Youzer Thinley, eis-primeiru-ministru Nepal, Madhav Kumar no husi Timor-Leste rasik, eis-prezidente no primeiru-ministru, José Ramos Horta nomós konvidadu espesiál seluk tan.

(Jornalista: Rafy Belo)

(Editór : Manuel Pinto)

HUSIK IDA HATÁN