Inimigo Foun Ba Timor Mak Hasai Povu Hosi Kiak

0
190
Presidenti da Republika Francisco Guterres akompanha husi Komandante Jeral FDTL Lere Anan Timur halao hela pasarevista ba Forsa Defesa Timor Leste wainhira ba visita ba komando FDTL hodi halo enkontru ho ofisiais sira iha Fatuhada, Segunda 10 Juinu 2017.Foto Tatoli/Antonio Goncalves

DILI (TATOLI) – Prezidenti Repúblika Francisco Guterres Lú Olo konsidera kondisaun moris povu Timor-Leste ne’ebé sei kiak no mukit nu’udar inimigo foun ba Luta Timor-Leste nian, maibé kona-bá defeza teritorial FALINTIL-Forsa Defesa Timor-Leste (F-FDTL) preparadu atu asegura.

“Ita laiha ona inimigu ho ema seluk iha mundu rai klaran, maibé ita nia inimigu mak oinsa ita bele hasai povu hosi kiak no mukit atu reduz posivél risku ne’ebé akontese iha futuru,” Prezidente Repúblika, Lu Olo informa iha Kuartel F-FDTL, Fatuhada, Segunda, (10/7).

Estetmentu Xefi Estadu ne’e, hodi fó hanoin ba servisu F-FDTL bainhira nia halo vizita ba dahuluk nu’udar Prezidenti Repúblika.

“Servisu no polítika dezenvolvimentu F-FDTL nian, hodi hateten nasaun foun Republika Demokratiku Timor-Leste laiha inimigu ho nasaun sira seluk, maibé ita nia inimigu mak oinsa bele hasai povu hosi kiak no mukit,” komandante Supremu F-FDTL ne’e afirma.

Hodi kontinua realsa F-FDTL laiha ona inimigu hosi nasaun sira seluk, forsa defeza ne’ebé preparadu atu halo defeza ba rai no kontra inimigu A eh B liuhosi misaun ne’ebé iha, maibé kumpre mós atu halo defeza di’ak liu ba polítika ne’ebé labele husik povu sai kiak ba rain rasik.

Presidenti da Republika Francisco Guterres akompanha husi Komandante Jeral FDTL Lere Anan Timur wainhira simu husi Forsa Defesa Timor Leste iha Kuartel jeral FDTL, Fatuhada hodi halao enkontru ho ofisiais sira, Segunda 10 Juinu 2017.Foto Tatoli/Antonio Goncalves

Aleinde ida ne’e, misaun F-FDTL hanesan forsa ne’ebé profesionál, forsa ne’ebé di’ak liu atu garante defeza ba nasaun Timor-Leste, maibé tenke obedese misaun umanitáriu hodi apoia komunidade sira nasionál no internasionál liuhosi edukasaun, saúde, infraestrutura no seluk tan.

Komandante Supremu Forsa Armada ne’e apresia mós F-FDTL tanba bele partisipa apoia manutensaun ba páz iha Nasoens Unidas, biar iha forsa kiik no nasaun kiik maibé hatudu ona hodi foti Timor-Leste iha mundu nia matan.

“Ha’u husik hela ha’u nia rekoñesimentu ba F-FDTL tanba kumpre misaun internasionál manutensaun Nasoens Unidas nian liuhosi dezenvolvimentu forsa defeza biar insituisaun seguransa sei iha difikuldade,” Lú Olo louva.

Hodi akresenta,  preparasaun F-FDTL presiza fó atensaun ba terorizmu, krime organizadu no seluk tan tanba bele akontese iha ita nia rai, kuandu misaun ne’e hala’o, presiza mós planu operasionál hodi define forsa armada ho subsidiariu komplementariedade.

(Jornalista : Zezito Silva, Editór : Manuel Pinto)

HUSIK IDA HATÁN