IADE Iha Alvu Formasaun ba Ema Na’in-1000 iha 2017

0
75
Diretora Nasionál Formasaun no Konsultoria Emprezariál, Institutu Apoiu ba Dezenvolvimentu Emprezariál (IADE), Beatriz Antónia dos Santos.

DILI (TATOLI)- Diretora Nasionál Formasaun no Konsultoria Emprezariál, Institutu Apoiu ba Dezenvolvimentu Emprezariál (IADE), Beatriz Antónia dos Santos informa, alvu formasaun ba kliente tinan 2017 iha IADE hamutuk ema na’in-1000.

Husi ema 1000 ne’e iha forma treinamentu iha aula no fó akompañamentu ba benefisiáriu atubele hala’o sira-nia negósiu ho di’ak liután.

“Ami iha síklu formasaun, molok atu fó formasaun, dahuluk ami halo promosaun no balun ne’ebé interese husu informasaun depois ami halo Training Needs Assessment, sira-nia hakarak no koñesimentu ne’e ba iha ne’ebé, sira-nia negósiu ne’e iha tiha ona ka la’e? Husi ida ne’e mak ami foin dezeñu pakote formasaun,” Beatriz hatete iha Mandarin-Dili, ohin.

Enkuantu ba ema sira ne’ebé seidauk iha negósiu no foin mak hakarak atu halo negósiu IADE fornese matadalan seluk no ema ne’ebé iha ona negósiu maibé hakarak atu hadi’a ne’e fó mós modul seluk nomós ema sira ne’ebé hala’o tiha ona negósiu no esperiénsia maibé hakarak aumenta tan fundu ruma, IADE ajuda hodi halo proposta para bele hetan kréditu husi banku.

“Iha tan apoiu ida, ami bolu fasilidade inkubasaun negósiu ne’ebé mak bele fasilita sira atubele hetan serbisu ida ne’e.”

Papél IADE mak fó koñesimentu liuliu ba empreendedorizmu, nune’e ema sira ne’ebé mak iha interese atu halo negósiu IADE nakloke ba ema hotu maibé ema ne’e iha hakarak duni.

Sobre formasaun IADE iha tinan ne’e katak atividade hala’o tuir síklu ba programa orsamentu nian hahú iha fevereiru to’o novembru no iha dezembru IADE halo atividade vizita no monitorizasaun.

Durante estabelese IADE kuaze iha ona benefisiáriu 3000 no progresu husi formasaun ne’e muda ona sira-nia hanoin no aumenta koñesimentu no balun aplika duni koñesimentu ida ne’e liuhusi halo jestaun ba osan no investe fali ba buat seluk.

(Jornalista : Maria Auxiliadora)

(Editór : Manuel Pinto)

HUSIK IDA HATÁN