Hong Long Esporta ona Ikan Tonelada 900 ba Xina

0
112
Peska Industriál. Foto Google.

DILI, (TATOLI) – Diretór Jerál no Peska, Ministériu Agrikultura no Peska (MAP), Acácio Guterres hatete peska industriál ne’ebé halo husi kompañia Hong Long, halo ona deskarregamentu ba-daruak nian no esporta ona tonelada kuaze 900 ba Xina.

Deskarregamentu ba ró 15 ne’e hala’o iha Karavel, Vemase, Autoridade Munisipál Baukau, depois tékniku MAP nian halo verifikasaun ba ikan sira ne’ebé mak peska husi ró sira ne’e hafoin bele halo esportasaun.

“Kompañia ida fali mós (Best Seafood) iha tempu badak sira mós atu esporta tan, ne’e mak ita agora hein hela para kuandu sira to’o mai, ita bá verifika produtu sira ne’e depois mak sira esporta”, Acácio informa iha Komoro, ohin.

Acácio hatutan daudaun ne’e diresaun simu mós proposta tolu no halo hela análize no pareser ba Ministru Agrikultura no Peska atu foti desizaun ba proposta husi kompañia ne’ebé hakarak atu hatama tan ró mai Timor-Leste.

“Agora daudaun kompañia rua husi Indonézia ne’ebé mak mai ona iha Timor-Leste maibé sira halo parseiru ho timoroan sira, ne’ebé agora prosesu hela sira-nia ró ne’e oinsá mak atu hatama mai iha Timór tanba tuir lei atu hatama ró tenke iha autorizasaun husi ministru”.

Entaun kompañia ne’e daudaun aprezenta hela sira-nia dokumentu ró nian depois ekipa téknika halo verifikasaun no buat hotu tuir kritériu no rekezitu maka  foin fó autorizasaun ró tama mai.

Entantu iha parte Kom, Munisípiu Lautein komunidade ezize ba ministériu atu hasai ró ne’ebé mak mout iha tasi tanba kompañia Saiseco ne’ebé halo atividade ba peska industriál ne’ebé la’o lato’o tinan rua paradu no to’o ohin loron kompañia laiha responsabilidade.

“Sira hanesan husik tiha de’it sasán sira ne’e iha Timór, sira la’o sees tiha entaun ró ne’e husik de’it iha ne’ebá tanba ne’e mak ró tolu ne’e ida mout tiha ona ne’ebé husi parte peska nian lori tali bá atu asegura nafatin no ita hein prosesu tuir baze legál ne’ebé iha karik Governu atu foti filafali para sai asset Governu nian no ita fó fali ba ema balun ne’ebé hakarak uza fali bá halo atividade”.

Jornalista: Maria Auxiliadora

Editora: Rita Almeida

HUSIK IDA HATÁN