Hadia Ekonomia Malázia Sei Investe Iha TL

0
162
Prezidenti no Sekretáriu Jerál Konfederasaun Providores Serbisu Association of Southeast Asian Nations (ASEAN), Ts Choo Kok Beng, ko´alia ba jornalista sira iha Palásiu Prezidénsia Repúblika.

DILI (TATOLI)—Prezidenti no Sekretáriu Jerál Konfederasaun Providores Serbisu Association of Southeast Asian Nations (ASEAN), Ts Choo Kok Beng, promete ba Prezidenti Repúblika Francisco Guterres Lú Olo katak, iha tempu besik sei investe iha Timor-Leste (TL) hodi ajuda hadi’ak ekonomia.

Promesa ne’e Ts Choo Kok Beng ho nia delegasaun halo bainhira realiza inkontru kortezia ho Prezidenti Repúblika, Dr. Francisco Guterres Lú-Olo iha Salaun Nino Konis Santana, Palásiu Prezidénsia Repúblika, Bairu-Pité, Dili, Kinta ne´e.

Choo hatete, Governu Malázia iha tempu badak hakarak lori investór sira hosi Malázia mai investe iha Timor-Leste atu hadi´a ekonomia nasaun ida ne´e. Ho investimentu ne´e Ts Choo Kok Beng garantidu sei loke tan kampu serbisu barak ba timoroan sira.

“Investimentu ne´e halai liu-ba iha skill tékniku. Ha´u fiar katak Timor-Leste sei hahoris infraestrutura ne´ebé barak iha futuru. Infraestrutura ne´e kompostu hosi estrada sira, harii otél sira iha rai okos, portu, aeruportu, sistema bee-moos no enerjia,” Ts Choo Kok Beng esplika.

Hodi dehan, molok to´o objetivu ida ne´e, ba dahuluk sei hahú kapasitasaun ba rekursu umanu timoroan sira.

Antes ne´e, Malázia hahú tiha ona investe iha Timor-Leste liu-liu Aeruporu Kay-Rala Xanana Gusmão Suai ne´ebé Malázia maka sai hanesan konsultan ba aeruportu refere.

Komitiva ne’ebé akompaña Prezidenti no Sekretáriu Jerál Konfederasaun Providores Serbisu ASEAN maka hanesan Embaixadora Malázia iha Timor-Leste, tékniku sira nomós Reprezentante Asosiasaun Nasionál Enjineirus Timor-Leste, Carlos Martins.

(Jornalista: Xisto Freitas, Editór : Manuel Pinto)

HUSIK IDA HATÁN