Governu Kontinua Kria Kondisaun ba Setór Privadu

0
61
Diskusaun Nasionál datoluk meza redonda entre setór privadu no públika ho tema “Asesu ba Kreditu” ne’ebé organiza husi Ministru Estadu Koordenadór ba asuntu Ekonómiku (MECAE) Estanislau da Silva iha Timor Plaza, ohin. Foto GPM

DILI, (TATOLI) – Sestu Governu Konstitusionál kontinua kria kondisaun liuhusi kriasaun lei, dekretu lei no orsamentu hodi kontribui ba dezenvolvimentu setór privadu iha rai laran.

Primeiru Ministru Interinu, Agio Pereira hato’o polítika ne’e bainhira loke Diskusaun Nasionál datoluk meza redonda entre setór privadu no públika ho tema “Asesu ba Kreditu” ne’ebé organiza husi Ministru Estadu Koordenadór ba asuntu Ekonómiku (MECAE) Estanislau da Silva iha Timor Plaza, ohin.

“Dame no estabilidade promove investimentu rai laran no liur, hametin fiar iha instituisaun Estadu sira hodi kontribui ba dezenvolvimentu setór produtivu iha rai laran”, dehan tan.

Lider Governu interinu ne’e afirma, kriasaun infraestutura bázika no formasaun ba kapasitasaun rekursu úmanu importante hodi apoiu kresimentu setór ekonómiku, liliu fortalesementu setór privadu.

“Promosaun senáriu emprezariál no investimentu atrativu ida hodi hasae setór privadu ida diversifikadu  atu asesu ba kreditu, oferese polítika fiskál kompetitiva, fasilita prosesu rejista empreza no kria ajénsia espesializada ne’ebé promove investimentu privadu no esportasaun, regulariza rejistu proriedade no rai nianʺ, tenik.

Alende ne’e halo promosaun koperasaun ho parseiru sira, la’os de’it iha rai laran, maibé mós internasionál hodi involve  partisipasaun empreza iha forum ne’ebé sei apoiu dezenvolvimentu setór privadu.

Primeiru Ministru interinu ne’e realsa, asegura administrasaun públika ida ne’ebé profísionál ne’ebé fó servisu públiku ho efisiensia no kualidade, hasae kualidade servisu iha jestaun no seluk tan.

“Kombate sala korupsaun nian importante mós atu hakat liu obstáklu sira ba dezenvolvimentu ekonómikuʺ, katak.

Tanba ne’e, atu haforsa setór privadu maka governu  iha 2017 apoiu millaun lima haforsa kapitál Banku Nasionál Komersiu Timor-Leste no millaun haat fó kréditu ba empreza ki’ik no médiu.

“Setór privadu sira atu simu responsabilidade  no esforsu, misaun atu dezenvolve negósiu sira  hodi loke kapítulo foun ida iha ita nia setór privadu, tanba la’ós de’it  Estadu maka lori kresimentu ekonómiku hodi hatudu mós país iha nivel rejionál no globál”, argumenta.

Ministru Estadu Koordenadór ba asuntu Ekonómiku, Estanislau da Silva hatutan dialogu ne’e atu hametin relasaun entre governu no setór privadu atu dezenvolve setór privadu hodi apoiu kresimentu ekonómia iha rai laran.

Jornalista: Agapito dos Santos

Editora: Rita Almeida

HUSIK IDA HATÁN