Governu-ILO Lansa Ona ENE Timor-Leste

0
56
Sekretáriu Estadu ba Polítika Formasaun Profisionál no Empregu (SEPFOPE) koopera ho Ministru Estadu Koordenadór Asuntu Ekonómiku (MEKAE) no Organizasaun Mundiál ba Traballu (ILO-sigla iha inglés) halo lansamentu ba programa Estratéjia Nasionál Empregu (ENE) iha Timor Plaza, horseik. Foto mídia SEPFOPE

DILI, (TATOLI) – Sekretáriu Estadu ba Polítika Formasaun Profisionál no Empregu (SEPFOPE) koopera ho Ministru Estadu Koordenadór Asuntu Ekonómiku (MEKAE) no Organizasaun Mundiál ba Traballu (ILO-sigla iha inglés) lansa ona programa Estratéjia Nasionál Empregu (ENE) 2017 to’o 2030 hodi promove oportunidade empregu no hamenus dezempregu iha Timor-Leste.
Ministru Estadu Koordenadór Asuntu Ekonómiku (MEKAE), Estanislau Aleixo da Silva, iha lansamentu hatete hasa’e kapasidade rekursu umanu hodi promove empregu sustentavel liuliu ba foinsa’e sira sai hanesan alvu importante no prioridade fundamentál husi VI Governu Konstitusionál hodi realiza kreximentu ekonómiku.

Nune’e mós sai hanesan objetivu importante ida ne’ebé define ona iha Governu nia matadalan ba reforma no fomentu ekonómiku atu hasa’e kreximentu ekonómiku presiza halo reforma ba regulamenu laborál no dezenvolve kapasidade forsa traballu.

“Tanba ne’e MEKAE sei koordena hamutuk ho SEPFOPE no ILO hodi dezenvolve programa estratéjia ida ne’e”, Estanislau hatete iha Timor Plaza, horseik.

Programa ENE atu kria oportunidade empregu ba foinsa’e timoroan sira iha idade konsidera prontu ona atu tama iha merkadu traballu hodi buka serbisu no hametin liután kampu empregu ne’ebé eziste ona ba foinsa’e no timoroan sira ne’ebé hetan ona serbisu iha merkadu traballu, nune’e hamenus númeru dezempregu nomós tulun hakbiit produtividade no kreximentu ekonomia.

SEPFOPE, Ilídio Ximenes da Costa hatutan ho realizasaun, implementasaun no kompromisu liuhusi lansamentu ENE ne’e, Governu ho nia kbiit persisténsia tomak sei hahú kria kondisaun ho hanoin inovativu hodi bele kontinua fasilita oportunidade empregu foun no hametin di’ak liután empregu ne’ebé eziste ona ba timoroan sira hotu inklui habelar no haforsa programa formasaun vokasionál ho kualidade ne’ebé alina tuir demanda rekerimentu merkadu traballu no nesesidade indústria lokál no rejionál atu nune’e bele tulun hakbiit produtividade no sustentabilidade kompetitivu ekonomia ba prosperidade povu iha nasaun.

Programa ENE ne’e iha pilár tolu ne’ebé presiza implementa mak hasa’e demanda ba merkadu traballu liuhusi promove  empregu ne’ebé kria husi setór privadu, hasa’e empregu migrasaun laborál, maximiza impaktu ba despeza públika iha empregu no dezenvolve potensialidade lokál, no hametin oferta ba merkadu traballu liuhusi dezenvolvimentu rekursu umanu, kontinua implementa planu ba Programa Edukasaun no Formasaun Téknika Profisionál hodi kria ligasaun lina ministeriál ne’ebé oferta entre Ministériu Edukasaun ho SEPFOPE, hametin no haburas programa sentru formasaun sira, hametin programa Ensinu Superiór sira, hadi’a sistema protesaun sosiál no promove igualdade jéneru.

Pilár seluk mós hametin instituisaun sira ne’ebé iha relasaun servisu merkadu traballu,nune’e presiza hametin polítika ativa iha merkadu traballu, hametin estrutura lina koordenasaun ministeriál sira-nian, hametin sistema informasaun merkadu traballu, hadi’a ligasaun entre prokura empregu ka sistema buka serbisu ho oportunidade demanda empregu no revé hikas fali lei traballu no mekanizmu fiksa saláriu.

Reprezentante ILO, Michiko Miyamoto hatete, empregu hanesan dalan ida krítiku atu atinje kreximentu ne’ebé bele hasa’e moris di’ak ema ki’ak sira-nian.

“Empregu produtivu no traballu dignu mak sai hanesan meiu prinsipál atu hasai povu husi ki’ak. Partisipasaun forsa traballu ne’ebé menus no difikuldade ba foinsa’e sira atu tama iha merkadu traballu mak sai defisiénsia boot ida. Estratéjia Empregu Nasionál 2017-2030 fornese estratéjia ida atu Governu no sosiedade sivíl tau atensaun maka’as no ligadu liután iha empregu no sei uza hanesan enkuadramentu ida hodi fó atensaun maka’as ba aspetu polítika empregu”.

Jornalista: Maria Auxiliadora

Editora: Rita Almeida

HUSIK IDA HATÁN