Governu Hanaruk Mandatu Parlamentu Foin-Sa’e

0
70
Parlamentu Foin-Sa'e Timoroan. Foto Google.

DILI, (TATOLI) – Sekretáriu Estadu Juventude no Desportu (SEJD), Leovigildo Hornay iha reuniaun Konsellu Ministru, ohin aprezenta alterasaun dahuluk ba Rezolusaun Governu númeru 23/2009 kona-ba Parlamentu Foin-Sa’e nian hodi estende durasaun tempu Parlamentu Foin-Sa’e nian ba tinan tolu.

Leovigildo hatutan atuál ne’e ezisténsia Parlamentu Foin-Sa’e tinan rua de’it, nune’e hakarak promove tan ba tinan tolu.

“Atu sira iha aproveitamentu ida di’ak liután tanba tinan rua ladún no dinámika ida foun, ita hakarak ita-nia joven sira bele prienxe no envolve iha formasaun tantu iha esterna no interna, no sira mós bele aproveita atubele hetan matéria depois aprofisiona no forma sira di’ak liután”, informa Leovigildo iha Palásiu Governu.

Aleinde ne’e SEJD aprezenta tan rezolusaun ida sobre ema ho difisiénsia ne’ebé hetan ona aprovasaun. Rezolusaun ema ho difisiénsia ne’e tanba feto ka mane nia reprezentante tenke iha no sei halo eleisaun interna ida.

“Ami hatama tan aspetu  ida importante tebes, aspetu ida ne’e mak liga ba formasaun tanba durante ne’e iha formasaun lideransa, edukasaun sívika, formasaun aspetu sira hanesan demokrasia, direitu umanu no ambiente”.

SEJD mós hakarak hatama tan rezolusaun ida kona-ba emprendedorizmu atu forma joven sira sai ema ne’ebé mak iha vizaun, nosaun no ideia sobre negósiu ki’ik no sira ne’e moris iha aldeia, suku, iha sira-nia eskola, universitáriu bele sai hanesan treinadór, formadór ba fali joven seluk.

“Tanba mundu agora presiza loke ona rede networking ba iha indústria ki’ik para depois eleva ekonomia família no joven nomós joven tenke dependente husi nia moris ekonomia ne’ebé sustentavel no saudavel no aprova hotu ona iha Konsellu-Ministru”, hatete tan.

Nune’e mós aprezenta esbosu polítiku nasionál desportu nian ne’ebé hetan mós aprovasaun husi Governu maibé SEJD tenke kompleta tan uitoan nune’e iha reuniaun Konsellu-Ministru nian tuirmai rekobertura fali para rezolusaun kona-ba polítika nasionál dezenvolvimentu desportu nian bele finaliza.

Jornalista: Maria Auxiliadora

Editora: Rita Almeida

HUSIK IDA HATÁN