Governu Aprova Ona Polítika Nasionál Desportu

0
94
Sekretáriu Estadu Juventude no Desportu, Leovigildo Hornai

DILI, (TATOLI) – Governu aprova ona polítika prioridade ba VI Governu Konstitusionál ne’ebé prepara husi Sekretáriu Estadu Juventude no Desportu (SEJD), Leovigildo Hornay mak dokumentu Polítika Nasionál Dezenvolvimentu Desportu iha reuniaun Konsellu Ministru, loron 18 jullu 2017.

Leovigildo Hornay iha Palásiu Governu, horisehik, hatete rezultadu ne’e hanesan promesa ne’ebé VI Governu Konstitusionál iha, liliu SEJD iha nia mandatu durante tinan rua ho balun.

“Husi pontudevista iha polítika rua, polítika nasionál juventude nian ho Dekretu Lei ida kona-ba estabelesimentu konsellu nasionál dezenvolvimentu juventude nomós rezolusaun polítika nasionál nian no polítika nasionál juventude nia aprovadu ona. Agora ha’u hein koordena ho Primeiru-Ministru para iha Governu jestaun ne’e, VI Governu Konstitusionál halo fali tomada pose ba  konsellu nasionál dezenvolvimentu juventude ne’ebé mak lidera rasik husi Primeiru-Ministru”.

Antes ne’e komisaun nasionál juventude hetan tiha ona tomada pose no buat hotu rezolvidu, nune’e hein atu entrega ba VII Governu liuliu ida ne’ebé sei troka atuál SEJD.

Polítika nasionál desportu iha konteúdu rua mak define klaru kona-ba desportu tradisionál, rekreativu, eskolár no alta kompetisaun no polítika seluk mak estratéjia intervensaun sira ne’ebé mak atu lida ba desportu alta kompetisaun, eskolár, rekreativu ka komunitáriu nomós tradisionál.

“Atu define didi’ak para ita hotu bele hatene katak ita hakarak tama iha football nian, ezemplu sé ita hakarak sai hanesan ekipa ba selesaun nasionál world cup, ita hakarak bá IFC nian saida-saida mak ita halo depois ita mós define kona-ba festival nasionál sira ne’ebé mak tenke orienta ona halo iha nivel munisípiu, ita atu dezenvolve infarestrutura hira, dezenvolve estádiu ho padraun internasionál hira, jinájiu ne’ebé ho multi funsaun hira iha Timór, hira iha Dili, munisípiu, nomós zona estratéjiku sira hanesan Maubise, Ponta Leste nian, ita bele define iha ne’ebá depois operasionaliza prosesu”.

Polítika nasionál ne’e sei implementa husi Governu foun ne’ebé sei mai maibé fundasaun hatuur ona husi VI Governu ida ne’e.

Jornalista: Maria Auxiliadora

Editora: Rita Almeida

HUSIK IDA HATÁN