Governasaun Foun Labele Partidariza Administrasaun Públiku

0
82
Primeiru Ministru, Rui Maria de Araújo iha ámbitu serimónia komemorasaun loron nasionál funsaun públika ba datoluk ne’ebé hala’o iha Sentru Konvensaun Dili. Foto GPM

DILI, (TATOLI) – Polítiku sira sei hetan konfiansa hosi povu iha 22 jullu atu governa VII governu konstitusionál maibé labele partidariza nafatin administrasaun públiku iha Repúblika Demokrátika Timor-Leste (RDTL).

“Ida ne’e responsabilidade ita hotu nian, ordem polítiku no ordem burokrátika, polítiku sira ne’ebé sei hetan konfiansa hosi povu iha eleisaun 22 iha mós responsabilidade atu labele nafatin partidariza administrasaun públiku”, hatete Xefe Governu, Rui Maria de Araújo iha nia intervensaun ba ámbitu loron nasionál funsaun públiku, sabadu, (15/7).

Governante ne’e hatutan, Nasaun sei la avansa bainhira administrasaun públiku partidarizada nafatin, realidade hatudu durante tinan rua ho balun, hatudu momós katak bainhira edukasaun partidarizada, servisu sei la la’o, saúde partidarizada servisu sei la la’o no bainhira ministériu sira buka implementa programa no projetu halo tuir diresaun polítiku tan nomeia ema kor polítiku, estadu ne’e sei la la’o ba oin.

“Ha’u nu’udar xefe governu iha tinan rua ho balun nia laran, governu bele iha polítiku di’ak no kualker partidu polítiku ne’ebé de’it hakarak duni implementa, sei la-hetan susesu bainhira administrasaun públiku la funsiona ho di’ak”, haktuir.

Administrasaun públiku mak sai hanesan ponte ligasaun entre polítiku ho realidade, polítiku sei la sai realidade, sei la sai benefisiu konkretu ba povu kuandu administrasaun públiku la halo servisu tuir nia kna’ar no la jere polítiku impementasaun ho di’ak.

Funsionáriu no dirijente funsaun públiku atu hatudu integridade, imparsialidade iha tranzisaun polítiku ne’ebé iha semana hirak tuir mai, tanba ne’e funsionáriu sira sai hanesan ezemplu públiku atu ema hotu banati tuir, la’os iha nivél funsaun públiku maibé nivél sira seluk iha sosiedade laran.

Enkuantu, renovasaun mandatu polítiku iha ita nia rai, kalendáriu polítiku hatudu katak, semana balun tan iha ona ordem polítiku maibé ordem burokratika administrasaun públiku sei hala’o nafatin nia kna’ar.

Funsionáriu públiku sira iha obrigasaun importante atu respeita servisu ho integridade nu’udar dalan atu hetan promósaun, la’os afiliasaun polítiku atu hetan promósaun.

Jornalista: Zezito Silva

Editora: Rita Almeida

HUSIK IDA HATÁN